قازاقستاننىڭ التىن- ۆاليۋتا قورى ارتتى
«2017 -جىلعى توعىز ايدا ۇلتتىق بانكتىڭ التىن- ۆاليۋتا رەزەرۆتەرى 10,2 پايىزعا ارتىپ، 32,5 ميلليارد دوللارعا دەيىن ءوستى. ۇلتتىق قوردىڭ شەتەل ۆاليۋتاسىنداعى اكتيۆتەرى 56,8 ميلليارد دوللاردى قۇرادى. ال حالىقارالىق رەزەرۆتەر 89,4 ميلليارد دوللاردى قۇرادى. بۇل ىشكى جالپى ءونىمنىڭ 60 پايىزىنا تەڭ»، - دەدى دانيار اقىشيەۆ.
سونىمەن قاتار ۇلتتىق بانك ءتوراعاسى ەلىمىزدىڭ اقشا جانە ۆاليۋتا نارىقتارىنداعى احۋالعا دا توقتالدى.
«9 - قازانداعى شەشىم بويىنشا بازالىق ستاۆكا 10,25 پايىز دەڭگەيىندە ساقتالدى. ۇلتتىق بانك ءۇشىن نارىقتاعى ستاۆكالاردىڭ نىسانالى ءمانى TONIA ينديكاتورى بولىپ تابىلادى. ول نىسان ءدالىزدىڭ تومەنگى شەگىنە جاقىن قالىپتاسادى. قىركۇيەكتە ول تومەنگى شەكتەن تومەن ءتۇستى. بۇل اۆتوماتتى رەپو سەكتورىنداعى تەڭگەلىك وتىمدىلىك ۇسىنىسىنىڭ وسۋىنە بايلانىستى بولدى. 22 - قىركۇيەكتەن باستاپ TONIA ينديكاتورى بازالىق ستاۆكا ءدالىزى شەگىندە ساقتالۋدا»، - دەدى ول.
ونىڭ ايتۋىنشا، ۇلتتىق بانكتىڭ اقشا نارىعىنداعى وپەراتسيالارى ارتىق تەڭگەلىك وتىمدىلىكتى الۋعا باعىتتالعان. ۇ ب وپەراتسيالارىنىڭ سالدوسى قىركۇيەكتىڭ سوڭىندا 1,5 تريلليون تەڭگە بولدى.
«قىسقا مەرزىمدى نوتتار نەگىزگى قۇرال بولىپ تابىلادى. قىركۇيەكتىڭ سوڭىندا اينالىستاعى نوتتار كولەمى 2,7 تريلليون تەڭگە بولدى. نوتتار بويىنشا كىرىستىلىكتىڭ شۇعىل بولۋىنا بايلانىستى 8,84-9,66 پايىز ارالىعىندا قالىپتاسۋدا»، - دەدى ول.
اۆتور: مارلان جيەمباي