قازاقستاندا عىلىمدى دامىتۋدىڭ جولدارى اتالدى
«البەتتە، عىلىمنىڭ دامۋى - كەز كەلگەن قوعامنىڭ دامۋىنىڭ نەگىزگى كورسەتكىشى. يزرايل، وڭتۇستىك كورەيا ەلدەرى تابيعي رەسۋرستارى بولماسا دا، يننوۆاتسياسى مەن ەكونوميكاسى جاعىنان الەمنىڭ ەڭ وزىق 10 ەلىنىڭ قاتارىنان كورىنىپ وتىر. ارينە، قازاقستاندا مۇناي نەمەسە گاز قورى مول بولعانىمەن، ولاردىڭ كۇندەردىڭ كۇنىندە تاۋسىلاتىنىن ءبىلىپ وتىرمىز. سوندىقتان، قازاقستان پرەزيدەنتى «ۇلت جوسپارى: 100 ناقتى قادام» باعدارلاماسىندا، وزگە دە تاپسىرماسىندا يننوۆاتسياعا نەگىزدەلگەن ەكونوميكانى قۇرۋدى تاپسىردى. دەمەك، عىلىمنىڭ دامۋى ءبىرىنشى ورىنعا شىعىپ وتىر»، - دەيدى ول.
عىلىم كوميتەتى ءتوراعاسىنىڭ ايتۋىنشا، قازاقستاندا عىلىم مەن يننوۆاتسيا سالاسىندا الەۋەت بار. «ءبىراق، شىنىندا دا عىلىم ەكونوميكاعا جۇمىس ىستەۋى ءۇشىن تىڭ امالدار كەرەك. سول سەبەپتى، ءدال وسى جوبا (ءونىمدى يننوۆاتسيالاردى دامىتۋ - اۆت. ) عالىمداردى ەكونوميكاعا جۇمىلدىرۋعا ارنالعان. قازىرگى تاڭدا عالىمداردىڭ جاس بۋىنىن دايارلاپ جاتىرمىز. ولار جوعارى وقۋ ورىندارى مەن ع ز و بازاسىندا دايارلانۋدا. ءبىز زامانىمىزدىڭ وزىق عالىمى رەتىندە اعىلشىن ءتىلىن مەڭگەرگەن، ءبىرىنشى قاينار كوزدەردەن عىلىم سالاسىنىڭ سوڭعى جەتىستىكتەرىن باقىلاپ وتىرا الاتىن، زاماننىڭ ەڭ وزىق زەرتتەۋ تەحنولوگيالارىن مەڭگەرگەن، شەتەلدىك عىلىمي كونفەرەنسيالاردا ءسوز سويلەي الاتىن ادامدى ەلەستەتىپ وتىرمىز. دەمەك، عالىم حالىقارالىق عىلىمي كەڭىستىككە بەيىمدەلگەن ادام بولۋى كەرەك»، - دەيدى بولاتبەك ءابدىراسىلوۆ.
ونىڭ ايتۋىنشا، قازاقستاندا مۇنداي عالىمدار بولعانىمەن، ەلىمىز ءۇشىن وكىنىشكە وراي، بۇل باعىتتا اتقارىلعان ەڭبەكتەن گورى اتقاراتىن جۇمىستار كوپ.
«قازىر مينيسترلىكتە عىلىمنىڭ 2025 -جىلعا دەيىنگى دامۋ باعدارلاماسى دايارلانۋدا. وندا ءبىز نەگىزگى باعىت رەتىندە قازاقستاننىڭ عىلىمي حالىقارالىق كونسورتسيۋمدارعا جانە عىلىمي ورتالىقتارعا ەنۋىن كوزدەپ وتىرمىز. قازىرگى ۋاقىتتا ءبىز ءۇشىن ونداي ورتالىقتار جابىق. سونداي- اق عىلىمدى اعىلشىن تىلىنە تولىعىمەن كوشىرۋدى جوسپارلاپ وتىرمىز. ويتكەنى، عىلىمدى اعىلشىن تىلىنە اۋدارىپ العان ەلدەر العا شىعىپ كەتكەن. قىتايدا، گەرمانيادا دا وسىنى بايقاۋعا بولادى. عىلىمنىڭ تسيفرلاندىرىلۋى، مالىمەتتەر بازاسىنىڭ قۇرىلۋى، عىلىمي جوبالاردى باسقارۋدا كوممۋنيكاتسيالىق تەحنولوگيالاردى قولدانا وتىرىپ، جوبالىق مەنەدجمەنت قۇرۋ - وسى ءۇش ترەند ءبىزدىڭ عىلىمدى جەتەكشى ورىنعا شىعارادى دەگەن سەنىمدەمىز»، - دەيدى ول.
اۆتور: ايان بەكەن ۇلى