قىتايلىق ستۋدەنتتەر اباي ولەڭدەرىن جاتقا وقىدى - فوتو، كەسكىن

بەيجىڭ. قازاقپارات - ق ح ر- ىنداعى ق ر ەلشىلىگىندە جىل سايىنعى ءداستۇرلى «اباي وقۋلارى» وتكىزىلدى.

بيىلعى شارا قىتاي مەن قازاقستان اراسىنداعى ديپلوماتيالىق بايلانىستاردىڭ ورناعانىنا 25 جىل تولۋىنا وراي ۇيىمداستىرىلدى، دەپ حابارلايدى «قازاقپارات» ح ا ا قىتايداعى مەنشىكتى ءتىلشىسى.

«اباي وقۋلارىنا» قىتاي سىرتقى ىستەر مينيسترلىگى مەن ق ح ر كوممەرتسيا مينيسترلىگىنىڭ وكىلدەرى، «تسزينتاي» مۋزەيىنىڭ ديرەكتورى جو حۋا، بەيجىڭ شەت تىلدەرى ۋنيۆەرسيتەتى جانىنداعى «قازاقستان ورتالىعىنىڭ» مەڭگەرۋشىسى حانشايىم قارابايەۆا، قىتايداعى شىعارماشىلىق ينتەلليگەنتسيا مەن قازاق دياسپوراسىنىڭ وكىلدەرى، ديپلوماتتار، قازاقستاندىق جانە قىتايلىق ستۋدەنتتەر قاتىستى.

ءوز كەزەگىندە ق ح ر- داعى ق ر- نىڭ ەلشىسى شاحرات نۇرىشەۆ 2014-جىلدىڭ 19- ناۋرىزىندا پەكيننىڭ ورتالىق «چاويان» ساياباعىندا ورناتلىعان اباي ەسكەرتكىشىنىڭ اۆتورى - قىتايلىق ءمۇسىنشى يۋان سيكۋنياعا جانە ەسكەرتكىشتىڭ بوي كوتەرۋىنە ىقپال ەتكەن قىتايلىق ديپلوماتتار مەن مادەنيەت قايراتكەرلەرىنە، سونداي-اق، قىتايدا ۇلى ويشىل شىعارماشىلىعىنىڭ كەڭىنەن ناسيحاتتالۋىنا سەپتىگىن تيگىزىپ جۇرگەن اۋدارماشى حا حۋانچجان («قاباي») مەن جازۋشى اقبار ماجيتكە العىسىن ءبىلدىردى.

ق ح ر س ءى م ەۋروپا جانە ورتالىق ازيا دەپارتامەنتى ديرەكتورىنىڭ ورىنباسارى ليۋ بين اباي مۇراسىنىڭ قازاقستان ءۇشىن عانا ەمەس، دۇنيەجۇزى حالىقتارى ءۇشىن وزەكتى ەكەنىن اتاپ ءوتتى.

«ابايدىڭ قارا سوزدەرى ءالى كۇنگە دەيىن وزەكتىلىگىن جويعان جوق. اباي - قازاقستاننىڭ سيمۆولى، قازاق حالقىنىڭ رۋحى. مەن ابايمەن العاش رەت 2000-جىلى قازاقستاندىق دوستارىم قىتاي تىلىنە اۋدارىلعان «اباي جولىن» سىيعا تارتقان كەزىندە تانىستىم. مەن ەپوپەيانى ءبىر دەممەن اپتا ىشىندە وقىپ شىقتىم. اباي بىزگە ولمەس مۇرا قالدىردى. مەنىڭ ويىمشا اباي قازاققا عانا ەمەس، كۇللى الەمگە ورتاق تۇلعا»، - دەدى ول اباي وقۋلارى بەيجىڭ ۋنيۆەرسيتەتىندە شەت تىلدەرىن مەڭگەرىپ جۇرگەن ستۋدەنتتەردىڭ كونسەرتتىك باعدارلاماسىنا ۇلاستى.

كەش سوڭىندا ەلشى ش. نۇرىشەۆ بەيجىڭ ۋنيۆەرسيتەتى جانىنداعى «قازاقستان ورتالىعىنىڭ» مەڭگەرۋشىسى حانشايىم قارابايەۆاعا قىتاي ستۋدەنتتەرىن اباي وقۋلارىنا دايىنداعانى ءۇشىن العىس حات تابىستادى.

«مەن قازاق ءتىلىن ءبىر جىلدان ارتىق ۋاقىت بويى مەڭگەرىپ كەلەمىن. بۇگىن ءبىرىنشى رەت «اباي وقۋلارىنا» قاتىسىپ تۇرمىن، ماعان وتە ۇنادى. اباي شىعارماشىلىعىمەن تانىسا وتىرىپ، ونىڭ رۋحاني مۇراسى مەنى قىزىقتىرا ءتۇستى. الداعى ۋاقىتتا ۇلى ويشىل شىعارمالارىمەن تەرەڭىنەن تانىساتىن بولامىن»، - دەدى بەيجىڭ شەت تىلدەرى ۋنيۆەرسيتەتىنىڭ 2-كۋرس ماگيسترانتى چجوۋ يۋ قازاقپاراتقا قازاقشا سۇحبات بەرىپ.