الماتىدا دۇنيەجۇزى قازاق جاستارى اراسىندا شاعىن فۋتبولدان جارىس ءوتتى - فوتو
تۋرنير الماتى قالاسىندا «ەر جانىبەك» حالىقارالىق قوعامدىق قورىنىڭ ۇيىمداستىرۋىمەن ءوتتى. بيىلعى تۋرنير بەلگىلى عالىم، فيلولوگيا عىلىمدارىنىڭ دوكتورى، پروفەسسور تۇرسىنبەك كاكىشيەۆتىڭ 90 جىلدىق مەرەيتويىنا ارنالدى.
ويىننىڭ ءبىرىنشى كۇنگى قورىتىندىسى بويىنشا، ەكىنشى كەزەڭگە «قازاق ىستانبۇل» (تۇركيا)، «ءامىر» (رەسەي، ساراتوۆ قالاسى)، «بايولكە» (موڭعوليا)، «داستان» (يران)، «NFC Kazakhstan پاۆلودار» (قازاقستان، پاۆلودار)، «بىرلىك-كەرۋەن» (الماتى)، «عافۋر» (الماتى)، «الاتاۋ» (الماتى) فۋتبول كوماندالارى (ف ك) جولداما الدى.
ەكىنشى كۇنگى ويىندا جارتىلاي فينالدا «NFC Kazakhstan پاۆلودار» مەن «ءامىر» ويناپ، 4:1 ەسەبىمەن «NFC Kazakhstan پاۆلودار» فينالعا شىقتى.
ال «بىرلىك-كەرۋەن» مەن «بايولكە» اراسىندا بولعان ويىندا 6:1 ەسەبىمەن «بىرلىك- كەرۋەن» فينالعا ءوتتى.
ءۇشىنشى ورىنعا تالاستا «ءامىر» ف ك «بايولكە» ف ك- نى جەڭىپ، 300 مىڭ تەڭگەنى قانجىعاسىنا بايلادى. ال «بايولكە» فۋتبولشىلارىنا 200 مىڭ تەڭگە سىياقى بەرىلدى.
ال فينالعا شىققان «بىرلىك كەرۋەن» مەن «NFC Kazakhstan پاۆلودار» اراسىنداعى ويىن 3:2 ەسەبىمەن اياقتالىپ، «ER JANIBEK CUP-2017» حالىقارالىق ءتۋرنيرىنىڭ كۋبوگىنا جانە 1 ميلليون تەڭگە قارجىلاي سىياقىعا «بىرلىك كەرۋەن» ف ك يە بولدى.
«NFC Kazakhstan پاۆلودار» كومانداسىنا 500 مىڭ تەڭگە سىياقى بەرىلدى.
«ءبىز بۇل تۋرنيرگە كوپ دايىندالدىق. بىلتىر قاتىسىپ ەسەمىزدى جىبەرىپ العان ەدىك. ال بيىل ۇتتىق. ءبارى جىگىتتەردىڭ كۇش- جىگەرى. ال تۋرنير جوعارى دەڭگەيدە ءوتتى. بۇرىن تەك شەتەلدەن كەلگەن قازاقتار اراسىندا وتەتىن. بيىل جەرگىلىكتى كوماندالار قوسىلىپ وتىر. وسى سەبەپتى دە تۋرنير قىزىقتى ءوتتى»، - دەدى جەڭىسكە جەتكەن «بىرلىك كەرۋەن» ف ك- نىڭ نەگىزىن قۇرۋشى مانات ماعاز.
بۇدان بولەك، «ەر جانىبەك» حالىقارالىق قوعامدىق قورىنىڭ تاعايىنداۋىمەن ۇزدىك ويىن كورسەتكەن «NFC Kazakhstan پاۆلودار» ف ك- نىڭ ويىنشىسى اسقار اجيكوۆ - «سۇرمەرگەن»، «قازاق ىستانبۇل» ف ك- نىڭ ويىنشىسى جانە احمەت بوزقۇرت - «ۇزدىك شابۋىلشى»، «ءامىر» ف ك- نىڭ قاقپاشىسى رۋسلان ماشتاكوۆ - «ۇزدىك قاقپاشى» جانە «نامىس» ف ك- نىڭ (رەسەي، ومبى) ويىنشىسى نۋراحمەت نيگمانوۆ «ۇزدىك قورعاۋشى» نوميناتسيالارى بويىنشا جەڭىمپاز اتاندى.
سونداي-اق، تۇرسىنبەك كاكىشيەۆ اتىنداعى ارنايى «ەلدىك رۋح» سىيلىعى فرانسيادان كەلگەن «Parij Kazakh sport» ف ك- عا جانە قىرعىزستاننان كەلگەن «الاش» ف ك- عا بەرىلدى.
الىستان ات ارىتىپ كەلگەن قازاق كوماندالارى ءتۋرنيردىڭ جابىلۋ سالتاناتىندا قوعامدىق قورعا جانە ۇيىمداستىرۋشىلارعا العىسىن ايتتى.
«بار ءومىرىن قازاق ادەبيەتىنە ارناعان تۇرسىنبەك كاكىشەۆتىڭ 90 جىلدىعىنا ارنالعان «ەر جانىبەك» حالىقارالىق قورىنىڭ فۋتبول ءتۋرنيرى قۇتتى بولسىن. ءبىزدى «شەتەلدەگى قانداستارىمىز» دەپ باۋىرىنا باسىپ جاتىر. سوندىقتان فرانسيا قازاقتارى اتىنان وسى شارانى ۇيىمداستىرۋعا ات سالىسقان بارلىق ازاماتتارعا العىس ايتامىز»، - دەدى پاريجدەگى قازاق مادەني ورتالىعىنىڭ جانە «Parij Kazakh sport» ف ك جەتەكشىسى تابارىك دوولۋ.
جەڭىماز كومانداعا كۋبوك تاپسىرعان «ەر جانىبەك» حالىقارالىق قوعامدىق قورىنىڭ پرەزيدەنتى جەڭىس تۇركيا ءسوز سوڭىندا بارلىق قاتىسۋشى كوماندالارعا العىس ءبىلدىردى.
ايتا كەتەيىك، «ER JANIBEK CUP-2017» حالىقارالىق ءتۋرنيرى 21- قازان كۇنى باستالعان. جارىسقا شەتەلدەن كەلگەن «قازاق ىستانبۇل» (تۇركيا)، ءامىر» (رەسەي، ساراتوۆ قالاسى)، «ءۇشتاس» (قىتاي، بەيجىڭ) «Parij Kazakh sport» (فرانسيا، پاريج)، «نامىس» (رەسەي، ومبى قالاسى)، «بايولكە» (موڭعوليا)، «الاش» (قىرعىزستان)، «داستان» (يران) كوماندالارى جانە قازاقستاننان «NFC Kazakhstan پاۆلودار» (قازاقستان، پاۆلودار)، «تايماس» (قازاقستان، سولتۇستىك قازاقستان وبلىسى)، «نامىس» (قازاقستان، تۇركىستان قالاسى)، «جەرۇيىق» (قازاقستان، تالدىقورعان قالاسى) كوماندالارى، سونداي-اق، الماتى قالاسىنان «بىرلىك-كەرۋەن»، «ساۋىر»، «ەرەنتاۋ»، «ءۇشقوڭىر»، «بەسقالا»، «بارىس»، «الاتاۋ»، «عافۋر» كوماندالارى قاتىستى.
اۆتور: كۇنسۇلتان وتارباي