مارحابا «اعا بۋىن تۇك بىتىرمەدى» دەپ نازدانعانى ءۇشىن ماقپال ءجۇنىسوۆانىڭ قاھارىنا ۇشىرادى
ءانشى بۇل جازباسىندا وتاندىق ەسترادادا جاڭاشىلدىقتىڭ جوقتىعىن تىلگە تيەك ەتىپتى. الايدا، ونەر يەسىنىڭ بۇل پىكىرى حالىق ءارتىسى ماقپال ءجۇنىسوۆانىڭ قۇلاعىنا جەتكەن...
بۇل تۋرالى ن ت ك ارناسىنىڭ «رەۆيۋ» باعدارلاماسىندا ايتىلدى.
مارحابا جەلىدەگى اتىشۋلى جازباسىندا: «وسى ءبىز، الدىڭعى ۇرپاق وكىلدەرىن كەرەمەت دەپ قابىلداپ، شىن-وتىرىگى ارالاس ايتەۋىر ماقتاپ، ءپىر تۇتۋعا قۇمارمىز. شىندىعى سول، تۇك بىتىرمەي، اتاقتىڭ، قالتاسىنىڭ قامىمەن جۇرە بەرىپتى.ءبىر جوعارى دەڭگەيدە ەرەكشە دۇنيە جاسايىنشى دەپ باس قاتىرماپتى»، - دەپ جازعان.
ال، بۇل پىكىرگە ماقپال ءجۇنىسوۆانىڭ ءوز ايتارى بار.
«بىزگە ءتيىپ جاتقان شىعار ول ءسوز. ءبىزدى ەشتەڭە جاسامادى دەپ ويلاسا، بىزگە «حالىق ءارتىسىن» بەكەر بەرگەن جوق. مەملەكەتتىك سىيلىقتى بەكەر بەرگەن جوق. ءبىزدىڭ ارحيۆتى اقتارسىن. قانشاما جىلدا، قانشاما ءان ايتىلدى. قانشاما گاسترولدىك ساپارلارعا باردىق»، - دەيدى ماقپال ءجۇنىسوۆا.
حالىق ءارتىسى، جاس ءانشىنىڭ شىعارماشىلىعىنان ازدى-كەم حابارى بارىن ايتادى. ءبىراق، مارحابانىڭ ورىنداۋىنا دەگەن ماحابباتى ويانا قويماعان.
«مەن ءبىر ءانىن بىلەمىن. «ۇنايسىڭ ماعان، ۇنايسىڭ ماعان...» دەگەندى قايتا-قايتا كوپ بەرەدى. قاتتى مەنىڭ جۇرەگىمدى تەبىرەنتسە، مەنىڭ ونىڭ اندەرىن تىڭدار ەدىم. ول مەنى تەبىرەنتكەن جوق. مەن ونى تىڭدامايمىن»، - دەدى اشىنعان حالىق ءارتىسى.
ونەر ولكەسىندەگىلەرگە وكپەسىن ايتقان مارحابا، جوعارداعى جازباسىن «وتىرىك، باكە، ساكە دەگەن كولگىرسۋ سىيلاستىقپەن، قاي ۇشپاققا شىعار ەكەنبىز»، - دەپ قورىتىندىلاعان. سونداي-اق وتاندىق ەستراداعا «وردا» توبىنىڭ عانا ءدۇمپۋ اكەلگەنىن ايتىپتى. الايدا، جاس ءانشىنىڭ شۋلى جازباسىنا قاھارلانعان تەك حالىق ءارتىسى عانا بولماي شىقتى.
«كەرەمەت جۇلدىز بولسا، كەرەمەت حالىقتىڭ كوڭىلىنەن شىعىپ، كەرەمەت قازاق ونەرىنە جاقسى دۇنيەلەر قالدىرىپ جاتسا، ءبىزدىڭ قاسىمىزدا جۇرمەي مە، ەسىمىزدە بولماي ما؟» - دەپ پىكىر ءبىلدىردى ءانشى شاحيزادا.
«ۇلكەن بۋىننان تاربيە الماعان دەپ ويلايمىن. مۇمكىن ۇستازسىز با. ول مەن جەتتىم، مەن تولدىم، مەن بولدىم دەگەن ادام ۇزاققا شاپپايدى دەپ ويلايمىن»، - دەيدى كومپوزيتور مارات وماروۆ.
الايدا، مارحابا بۇل تاقىرىپقا قاتىستى پىكىر بىلدىرۋدەن باس تارتتى. ءتىپتى، پاراقشاسىنداعى پوستتى دا ءوشىرىپ ۇلگەرگەن. الداعى ۋاقىتتا، جاس ءانشى بۇل جازباسىنىڭ ناقتى كىمدەرگە باعىتتالعانىن ايتىپ، ماردىمدى جاۋابىن بەرەر دەگەن ويدامىز.
ەسكە سالا كەتەيىك، «جۇلدىزدى جەكپە-جەك» جوباسىندا مەيرامبەك بەسبايەۆ باستاعان ءبىر توپ ونەر دۇلدۇلدەرى مارحابانى اسىرا ماقتاپ، كەلەسى كەزەڭگە وتكىزگەن بولاتىن. مارحابا قازىلار القاسىنىڭ شەشىمى بويىنشا تانىمال ءانشى ءمولدىر اۋەلبەكوۆادان باسىم ءتۇستى. ارمان دۇيسەنوۆ، ۇلىقپان جولداسوۆ سىندى كومپوزيتورلار مارحابانىڭ ونەرىنە عاشىق ەكەندەرىن ايتسا، ساكەن مايعازيەۆ ءتىپتى مارحابانى ىسقىرىقپەن ءان سالاتىن ەلىمىزدەگى ءۇش ءانشىنىڭ قاتارىنا قوستى.
ايتا كەتەيىك، مارحابادان بولەك، ساكەن مايعازيەۆتىڭ تىزىمىندە ديماش قۇدايبەرگەن مەن جانار دۇعالوۆا بولدى.