La Stampa گازەتىنە سىلتەمە جاساپ ت ا س س اگەنتتىگىنىڭ جازۋىنشا، ۆەنەتودا سايلاۋعا ەلەكتوراتتىڭ 59,7 پايىزى قاتىستى.
الدىن الا مالىمەت بويىنشا، ولاردىڭ 98 پايىزى اۆتونوميا ءۇشىن داۋىس بەرسە، 2 پايىزى وعان قارسى بولعان.
ءسال كەيىنىرەك، كورشى لومبارديا وبلىسىنداعى رەفەرەندۋمنىڭ الدىنا الا ناتيجەلەرى بەلگىلى بولدى. Reuters-ءتىڭ حابارلاۋىنشا، مۇندا دا تۇرعىنداردىڭ باسىم دەنى (95 پايىزى) ورتالىق ۇكىمەتتەن دەربەستىك ءۇشىن داۋىس بەرگەن. سايلاۋعا قاتىسۋ 40 پايىزدى قۇرادى.
ايتا كەتەيىك، ۆەنەتو مەن لومباردياداعى رەفەرەندۋمدار كونسۋلتاتيۆتىك سيپاتقا يە جانە ولاردىڭ وبلىس دەڭگەيلەرىنە تىكەلەي جانە شۇعىل تۇردە اسەر ەتپەيدى. اۆتونومياعا قولداۋ بىلدىرىلگەن جاعدايدا اتالمىش ەكى ءوڭىر باسشىسى يتاليا كونستيتۋتسياسىندا قاراستىرىلعانداي، ەل ۇكىمەتىمەن كەلىسسوزدەردى باستاۋ ءۇشىن حالىقتىق مانداتقا يە بولادى.
ۆەنەتو مەن لومبارديا يتاليا ەكونوميكاسىنىڭ ۇشتەن ءبىر بولىگىن قۇرايدى.