جامبىل وبلىستىق اكىمدىگىنىڭ باسپا ءسوز قىزمەتى حابارلاعانداي، ءوڭىر باسشىسى كارىم كوكىرەكبايەۆ مويىنقۇم اۋدانىنا جاساعان جۇمىس ساپارى بارىسىندا بالقاش كولىنىڭ جاعاسىنداعى مىڭارال اۋىلىندا ورنالاسقان بالىق زاۋىتىندا بولدى.
ەسكە سالايىق، 2014-جىلى تاۋەلسىزدىك كۇنى قارساڭىندا قولدانىسقا بەرىلگەن بالىق وڭدەۋ زاۋىتى ۇدەمەلى يندۋستريالىق-يننوۆاتسيالىق دامۋ مەملەكەتتىك باعدارلاماسى اياسىندا جۇزەگە اسىرىلعان ءىرى جوبالاردىڭ ءبىرى سانالادى.
مىڭارال بالىق زاۋىتى جىلىنا كەم دەگەندە 1,5 مىڭ توننا ءونىم شىعارادى. جوبانىڭ جالپى قۇنى 600 ميلليون تەڭگەنى قۇرايدى، سونداي-اق 200 جۇمىس ورنى اشىلعان. زاۋىتتا جيىرما قايىق جانە تاجىريبەلى بالىقشىلار بار.
زاۋىت ديرەكتورى سەرگەي ءنيدىڭ ايتۋىنشا، كاسىپورىن تازارتىلعان بالقاش بالىعىن (كوكسەركە، سازان، اقتابان، جىلانباس بالىق، اقمارقا، تورتا بالىق)، بالىق سۇبەسىن، كەپتىرىلگەن بالىقتى، شيكىزاتتى تەرەڭ وڭدەۋ ونىمدەرى - بالىقتىڭ سۇيەگىنەن جاسالعان ۇن جانە بالىقتىڭ تارتىلعان ەتىن شىعارادى.
زاۋىت ايىنا 40 توننا كەپتىرىلگەن بالىقتى وندىرەدى. دايىن ونىمدەر قازاقستاننىڭ ىشكى نارىعىنا دا، رەسەي مەن ۋكرايناعا ەكسپورتقا دا جىبەرىلەدى.