ءاربىر كورەي ەتنوسى قازاقستاندى ءوز وتانى سانايدى - روزا پاك

شىمكەنت. قازاقپارات - وڭتۇستىك قازاقستان وبلىستىق كورەي ەتنومادەني بىرلەستىگىنىڭ ۇيىمداستىرۋىمەن «قازاقستان حالقى اسسامبلەياسى» عيماراتىندا كورەي ەتنوسىنىڭ ءتىلى، مادەنيەتى جانە سالت-ءداستۇرى كۇنى اتالىپ ءوتتى.

بۇل مەرەكە كورەي ەتنوسىنىڭ قازاقستانعا كۇشتەپ قونىستاندىرىلعانىنا 80 جىل تولۋىنا وراي ۇيىمداستىرىلدى، دەپ حابارلايدى قازاقپارات ءتىلشىسى.

مەرەكەلىك ءىس- شارانىڭ اشىلۋىندا ءسوز العان وبلىس اكىمىنىڭ ورىنباسارى ۇلاسبەك سادىبەكوۆ وبلىس اكىمى، وقو قازاقستان حالقى اسسامبلەياسىنىڭ ءتورعاسى جانسەيىت تۇيمەبايەۆتىڭ سالتاناتتى جيىنعا قاتىسۋشىلارعا ارنالعان قۇتتىقتاۋىن وقىپ بەردى. وندا قوعامدىق كەلىسىم مەن جالپى ۇلتتىق بىرلىك سالاسىنداعى مەملەكەتتىك ساياساتتى ىسكە اسىرۋدا كورەي ەتنومادەني بىرلەستىگىنىڭ قوسىپ كەلە جاتقان سۇبەلى ۇلەسى اتالىپ وتىلگەن.

جيىندا ۇلاسبەك سادىبەك ۇلى مەملەكەتتىڭ ساياسي، ەكونوميكالىق جانە مادەني دامۋىنا لايىقتى ۇلەس قوسىپ جۇرگەن كورەي ەتنوسىنىڭ وكىلدەرىنە وبلىس اكىمىنىڭ العىس حاتىن سالتاناتتى تۇردە تابىس ەتتى. مەرەكەلىك باسقوسۋدا وقو قازاقستان حالقى اسسامبلەياسى باسشىلىعى مەن وبلىستىق قۇرمەتتى ازاماتتارى، وبلىستىق انالار كەڭەسىنىڭ ءتورايىمى اسما قالىبەكوۆا سىندى قوناقتار ءسوز سويلەپ، بىرلىگى بەكەم ەلدىڭ عانا بەرەكەسى ارتىپ، مەرەيى ۇستەم بولاتىندىعىن اتاپ ءوتتى.

قازاق ەلىنە زور العىسىن بىلدىرگەن وبلىستىق كورەي ەتنومادەني بىرلەستىگىنىڭ ءتورايىمى روزا پاك ءاربىر كورەي ەتنوسى قازاقستاندى ءوز وتانىم دەپ سانايتىنىن جەتكىزدى.

«قيىن جىلدار كەزەڭىندە قازاق حالقىنىڭ ءبىزدىڭ اتا-بابالارىمىزدى ىستىق ىقىلاسپەن قارسى العانىن العىس سەزىممەن ەسكە الامىز. قازاق حالقىنىڭ دارحاندىعىنىڭ ارقاسىندا ءوسىپ- وندىك. بۇگىندە بىرلىگى جاراسقان، بولاشاعى زور مەملەكەتتە ءومىر ءسۇرىپ جاتىرمىز. ورتاق وتانىمىزدىڭ كوركەيۋى ءۇشىن ايانباي ەڭبەك ەتەتىن بولامىز، - دەدى روزا پاك.

سالتاناتتى شارادا ەتنومادەني بىرلەستىكتەردىڭ جانىنداعى شىعارماشىلىق ۇجىمدار دايىنداعان كونتسەرتتىك باعدارلاما كوپشىلىكتىڭ نازارىنا ۇسىنىلدى.

ايتا كەتەرلىگى، 1937 -جىلدارى 100 مىڭداي قيىر شىعىس كارىستەرى ەلىمىزدىڭ ءار ايماعىنا كۇشتەپ جەر اۋدارىلعان بولاتىن. بۇگىندە ەلىمىزدە 100 مىڭنان استام كورەي دياسپوراسى ءومىر سۇرۋدە. ال وڭتۇستىك قازاقستان وبلىسىندا 9 مىڭنان استام كورەي ەتنوسىنىڭ وكىلدەرى تۇرادى. وڭىرىمىزدە كورەي ەتنومادەني بىرلەستىگى 1989 -جىلى قۇرىلىپ، 1997 -جىلى «قازاقستان كورەيلەرى قاۋىمداستىعى» رەسپۋبليكالىق قوعامدىق بىرلەستىگىنىڭ فيليالى رەتىندە قايتا تىركەۋدەن ءوتتى.

ەتنومادەني بىرلەستىك جانىنان ارداگەرلەر القاسى مەن جاستار قاناتى، جەكسەنبىلىك مەكتەپ، «مارانبون» فولكلورلىق ءانسامبلى جانە كەنتاۋ قالاسى مەن ماقتارال، سارىاعاش، سايرام، تولەبي اۋداندارىندا فيليالدارى جۇمىس ىستەيدى. بۇل بىرلەستىك ەل بىرلىگىن بەكەمدەۋ، تۇراقتىلىقتى ساقتاۋ باعىتىندا اتقارىلعان كەشەندى ءىس- شارالاردىڭ جانىنان تابىلىپ كەلەدى.

 

فوتو http://yassae.ru