اتامبايەۆ سايلاۋ ۋچاسكەسىندە جۋرناليستەردىڭ سۇراقتارىنا جاۋاپ بەردى. اتامبايەۆ كەيىن دە شىعارماشىلىقپەن اينالىساتىنىن ايتىپ ءوتتى.
«شىعارماشىلىق پەن ساياساتتى بىرگە الىپ جۇرۋگە بولادى. سىزدەر قورىقپاڭىزدار، مەن پرەزيدەنت نەمەسە پرەمەر-مينيستر بولايىن دەپ جاتقان جوقپىن. وسىعان دەيىن دە 30 جىل بويى ساياساتپەن اينالىسقانمىن. ول ماعان ولەڭ جازۋعا نە پروزا جازۋعا، ءتىپتى ءان جازۋعا كەدەرگى كەلتىرگەن جوق»، - دەدى اتامبايەۆ.
«مەن ءوزىمنىڭ بىردە-ءبىر ارەكەتىمنەن قورىقپايمىن. قىرعىزستاندا قالامىن، ءاربىر ءسوزىم ءۇشىن، ءاربىر ارەكەتىم ءۇشىن جاۋاپ بەرەمىن. جاسىراتىن ەشتەڭەم جوق. جاسىرىنبايمىن دا. حالىق الدىندا، قۇداي الدىندا جاۋاپ بەرۋگە دايىنمىن»، - دەدى قىرعىزستاننىڭ قازىرگى پرەزيدەنتى المازبەك اتامبايەۆ.
ايتا كەتەيىك، بۇگىن، 15 -قازاندا قىرعىزستاندا پرەزيدەنت سايلاۋى ءوتىپ جاتىر. سايلاۋعا 11 ۇمىتكەر قاتىسىپ وتىر: ەرنيس زارلىكوۆ، توكتوايىم ۋمەتاليەۆا، تەمير ساريەۆ، ۋلۋكبەك كوچكوروۆ، تاالاتبەك ماسادىكوۆ، ومۋربەك بابانوۆ، ارستانبەك ابدىلدايەۆ، ازيمبەك بەكنازاروۆ، سوورونباي جەەنبەكوۆ، اداحان مادۋماروۆ پەن ارسلانبەك ماليەۆ.