تالدىقورعاندا تۇركىتىلدەس ونەرپازدار باس قوستى - فوتو

تالدىقورعان. قازاقپارت - جەتىسۋ جەرىندە تۇڭعىش رەت «ماڭگىلىك ەلدىڭ ماڭگىلىك سارىنى» اتتى حالىقارالىق ءداستۇرلى مۋزىكا فەستيۆالى ءوتتى.

وتاندىق جانە شەتەلدىك ونەرپازدار ۇسىنعان گالا كونتسەرتتى جەتىسۋلىقتارمەن بىرگە الماتى وبلىسىنىڭ اكىمى اماندىق باتالوۆ تاماشالادى، دەپ حابارلايدى قازاقپارات ءتىلشىسى.

اۋقىمدى شاراعا تەگى تۇركى سانالاتىن بىرنەشە ەلدىڭ ياعني، تۇركيا، تۇرىكمەنستان، تاتارستان، وزبەكستان، قىرعىزستان، ياكۋتيا مەن تۋۆادان بەلگىلى ونەر مايتالماندارى قاتىستى. ماسەلەن، حالىق تىۆا رەسپۋبليكاسىنىڭ ءانشىسى يگور كوشكەندەيدىڭ ونەرىنە ەرەكشە ءتانتى بولدى. ول كومەيمەن ءان سالۋدىڭ التى ءتۇرىن جەتىك مەڭگەرگەن. تاعى ءبىر تاڭعاجايىپ تالانت يەسى ساحا ەلىنەن كەلگەن يۋليانا كريۆوشاپكينا. ونىڭ شاڭقوبىزبەن ورىنداعان اۋەنى تالايدى تاڭداي قاقتىردى.

«فەستيۆالگە قاتىسۋعا بىردەن كەلىسىمىمدى بەردىم. سەبەبى، ءوزىم دە قازاقستاندا ونەر ساپارىمەن ءجۇر ەدىم. ءساتى ءتۇسىپ تۇرعاندا جەتىسۋ جۇرتىنىڭ الدىندا ونەر كورسەتكىم كەلدى»، دەيدى يۋليانا كريۆوشاپكينا.

تۇركيالىق ونەرپاز يرفان گيۋردالعا دا ەل ريزا بولدى. ول جەتىسۋلىق كورەرمەن الدىندا الدىمەن انا تىلىندە ءان سالدى. تۇرىك ءانشىسىنىڭ ءان قورجىنىندا قازاقتىڭ 10 عا جۋىق ءانى بار ەكەن.

تۇركى الەمىنىڭ اۋەزدى شىعارمالارى ورىندالعان كونسەرتتىڭ قىزىقتى، مازمۇندى وتكەنى سونشالىق كورەرمەن ۇيىپ تىڭداپ، الاقاندارىن شاپالاقتاۋمەن بولدى. جەتىسۋ جەرىندە ۇيىمداستىرىلعان تۇركى مۋزىكاسىنىڭ فەستيۆالى كەلەسى جىلى دا وتەدى دەپ جوسپارلانىپ وتىر. شارا «رۋحاني جاڭعىرۋ» باعدارلاماسى اياسىندا تۇڭعىش رەت ۇيىمداستىرىلدى.

ماقساتى - ۇلتتىق ونەردى ۇلىقتاۋ، فولكلورلىق جانردى كەڭىنەن ناسيحاتتاۋ، ەتنوگرافيالىق ۇجىمداردىڭ ءوزارا شىعارماشىلىق بايلانىسىن دامىتۋ. فەستيۆالگە «TURKSOY» تۇركى مادەنيەتىن جانە ونەرىن دامىتۋ حالىقارالىق ۇيىمى مەن جەرگىلىكتى بيلىك قولداۋ كورسەتتى.