ە. ساعاديەۆ: لاتىن الىپبيىنە كوشۋ ءۇشىن مۇعالىمدەر ارنايى كۋرستان وتكىزىلەدى

استانا. قازاقپارات - لاتىن الفاۆيتىنىڭ ەكىنشى نۇسقاسى دا قوعامدىق تالقىعا سالىنۋى كەرەك. مەملەكەت باسشىسىنىڭ بۇل پاراساتتى پايىمى اسىعىستىققا جول بەرىلمەيتىنىن اڭعارتتى. جاڭا ءالىپبيدى ازىرلەۋ جونىندەگى جۇمىس توبىنىڭ ءتوراعاسى ەردەن قاجىبەك وسىلاي دەيدى.

 ونىڭ ايتۋىنشا، جاڭا الفاۆيت نۇسقاسى قوعامدا قىزۋ پىكىرتالاس تۋدىرعاندىقتان، ءتول دىبىستاردى تاڭبالاۋ ءتاسىلى وزگەرگەن. وسىنى ەسكەرگەن پرەزيدەنت تە ەل ءۇشىن اسا ماڭىزدى مىندەتتى جان- جاقتى زەردەلەپ قانا جۇزەگە اسىرۋ قاجەتتىگىن اتاپ ءوتتى.

ەردەن قاجىبەك، ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى:

- قوسار دىبىستار بويىنشا شىنىندا جۇرتشىلىق تاراپىنان كوپ سۇراقتار تۋىنداعانى راس. سوندىقتان ەلگە ءبىر جەڭىلدەۋ جولمەن ءتول دىبىستاردى تاڭبالاساق دەگەن ۇسىنىس ۇسىنىلىپ وتىر. بۇل دايەكشە تۇرىنە ا. بايتۇرسىنوۆ تا ەرەكشە نازار اۋدارعان. ەلباسى ايتقانداي، ءبىز قازىر تالقىلاپ جاتىرمىز، ءالى دە تالقىلانادى.

ءبىلىم جانە عىلىم مينيسترلىگى دە ءالىپبيدىڭ ناقتى نۇسقاسى قابىلدانعان سوڭ عانا ونى ەنگىزۋ جۇمىستارى كەشەندى تۇردە جۇرگىزىلەتىنىن حابارلادى. «ول ءۇشىن مۇعالىمدەر دە ارنايى كۋرستان وتكىزىلۋى مۇمكىن»، -  دەيدى جاۋاپتى سالا باسشىسى.

ەرلان ساعاديەۆ، ق ر ءبىلىم جانە عىلىم ءمينيسترى:

- ەنگىزۋ كەستەسىن دەپۋتاتتارمەن اقىلداسىپ، حالىقپەن اقىلداسىپ بارىپ ەلباسىعا كورسەتۋ كەرەك. ءارى قاراي ءبارى ءبىر كەلىسىمگە كەلسە، لاتىن گرافيكاسى ارقىلى جۇمىستاردى جالعاستىرامىز. ەڭ الدىمەن مۇعالىمدەردى دايىندايمىز. مۇعالىمدەر جەتكىلىكتى بولعاندا، جۇمىستاردى باستايمىز.

www.24.kz