ماسكەۋ سوتى قازاقستاندىق جۇرگىزۋشىنى قاماۋعا الدى

استانا. قازاقپارات - ماسكەۋدىڭ مەشانسكي سوتى 6 -قازاندا ۆلاديمير وبلىسىنداعى پوكروۆ ستانساسى اۋماعىندا تەمىرجول وتكەلىندە پويىزبەن سوقتىعىسۋ سالدارىنان 17 ادام قازا تاپقان اپاتقا كىنالى اۆتوبۋس جۇرگىزۋشىسىن قاماۋعا الدى، دەپ حابارلايدى تاسس.

سوت شەشىمى بويىنشا، سارمانوۆ 6 -جەلتوقسانعا دەيىن قاماۋدا بولادى. سوتتا ول پويىزبەن سوقتىعىسار الدىندا جۇرگىزۋشى مەن جولاۋشىلاردىڭ وتكەلدە ءوشىپ قالعان اۆتوبۋستى قولدارىمەن يتەرىپ قوزعاماقشى بولعانىن حابارلادى.

ونىڭ سوزىنە قاراعاندا، شلاگباۋم جابىلعاننان كەيىن جۇرگىزۋشىلەر جولاۋشىلاردى اۆتوبۋستان شىعۋعا شاقىرعان. ءبىراق ولاردىڭ كوپشىلىگى ۇيىقتاپ جاتقان، ارالارىندا ءىشىپ العاندارى دا بولعان. «ءبىز ءبارىڭ شىعىڭدار، دەپ ايقايلادىق، ءبىراق ادامدار ۇيىقتاپ جاتتى، ءبىرقاتارى ماس بولدى»، - دەدى سارمانوۆ.

جۇرگىزۋشىنىڭ اتاپ وتۋىنشە، اۆتوبۋس ساپارعا شىعار الدىندا اقاۋسىز بولعان.