يوردانيادا كوشپەندىلەر ستيلىندەگى قازاق ءبولىمى كوپشىلىكتى قىزىقتىردى - فوتو
جارمەڭكە حالىقتاردىڭ مادەنيەتى مەن ونەرىن بىرىكتىرۋ، قايىرىمدىلىق كومەك كورسەتۋ ماقساتىندا ۇيىمداستىرىلادى. اممانداعى قازاقستاندىق پاۆيلون كوشپەندىلەر ستيلىمەن راسىمدەلگەن.
ءبىر كۇندىك ديپلوماتيالىق جارمەڭكەدەن تۇسكەن تابىس جەتىمدەر ۇيىنە جانە زەين ال-شاراف حانشايىم 1958 -جىلى نەگىزىن قالاعان «مۋبارات ۋم ال-حۋسەين» قامقورسىز قالعان بالالارعا كومەك كورسەتۋ ورتالىعىنا جۇمسالماق. شاراعا قاتىسۋشى ءاربىر ەلدىڭ ەلشىلىگى ءوز ەلدەرىنىڭ ۇلتتىق ستيلدەگى ەڭ ۇزدىك تاۋارلارىن كورسەتتى.
«قازاقستان ەلشىلىگى شاراعا بەلسەندى تۇردە قاتىسا وتىرىپ، وزدەرىنىڭ الەۋمەتتىك جاۋاپكەرشىلىك تۇجىرىمداماسىن بەرىك ۇستاناتىندىعىن كورسەتىپ وتىر»، - دەدى ەلشى ازامات بەردىبايەۆ.
جارمەڭكەدەگى قازاقستان پاۆيلونى ءوزىنىڭ ۇلتتىق تولتۋمالىعىمەن ەرەكشەلەندى. وعان قازاق قولونەرشىلەرىنىڭ قولىنان شىققان اشەكەيلەر، كيىمدەر، مۋزىكالىق اسپاپتار جانە باسقا دا كۇندەلىكتى قولدانۋعا قاجەتتى زاتتار قويىلدى.
قازاقتىڭ كيگىز كۇيى ستيلىندەگى پاۆيلون يوردانيانىڭ باسما بينت تالال حانشايىمىن قاتتى قىزىقتىردى. حانشايىم قازاق پاۆيلونىنا باس سۇعىپ، قازاقى داستارحاننان ءدام تاتتى، قاسيەتتى قارا دومبىرادان شىققان اۋەندى تىڭدادى.
ايتا كەتۋ كەرەك، شارادا كيگىز ءۇي ستيلىندەگى قازاق پاۆيلونىنا كەلۋشىلەر كوپ بولدى. ساۋد ارابياسىنان جەكەلەي كەلۋشىلەر قازاق كيگىز ءۇيىن ساتىپ العىسى كەلەتىندىكتەرىن ءبىلدىرىپ جاتتى.