قىرعىزستاندىق دەپۋتات: قازاقستاننان اكەلىنەتىن ۇن دەنساۋلىققا زيان
سەبەبى زاڭ تالاپتارىنا ساي كەلمەيتىن ۇن دەنساۋلىققا زيان جانە كوپتەگەن اۋرۋدىڭ تۋۋنا اكەلەدى. جەرگىلىكتى ب ا ق- تىڭ جۋرناليسى اتالمىش ماسەلەنى كوتەرگەن قىرعىزستان دەپۋتاتى ەكمات بايپاكبايەۆپەن سۇحباتتاستى.
- ەكمات جۋرۋكباي ۇلى، قىرعىزستان كەدەندىك وداققا مۇشە بولعالى ەلگە قازاقستاننان بايىتىلماعان ۇن جەتكىزىلە باستادى...
- مەن ءوزىم دە دەنساۋلىق ساقتاۋ مينيسترلىگىندە بايىتىلماعان ۇننىڭ ەكسپورتتالاتىنى تۋراسىندا جازىلعان قۇجاتتاردى كورىپ تاڭقالدىم. زاڭدى كوتەرىپ ەدىم، ول 2009 -جىلى قابىلدانىپ قويعان ەكەن. ول ۋاقىتتا كومبيناتتارعا بايىتىلماعان ۇندى ساتۋعا تىيىم سالىنعان. زاڭدى بۇزعاندار اكىمشىلىك جاۋاپكەرشىلىككە تارتىلاتىن بولعان.
- ول زاڭ قازىر جۇمىس ىستەمەي مە؟
- ءيا، سەبەبى كەدەندىك وداققا مۇشە بولعالى ۇننىڭ � ى قازاقستاننان ەكسپورتتالاتىن بولدى. قازاقستاندىق زاڭعا سايكەس، ەكسپورتتالاتىن ۇن بايىتىلمايدى. ال قىرعىزستان ارزان ەكەنىنە قىزىعادى دا ساتىپ الادى. ال ونى حالىق تۇتىنادى. دەنساۋلىق ساقتاۋ مينيسترلىگىنىڭ مالىمەتىنە سايكەس، قىرعىزستاندا 2 جىلدىڭ ىشىندە اعزاسىنا تەمىر جەتىسپەيتىن ادامداردىڭ سانى ارتقان.
- 2 جىل بويى بايىتىلماعان ۇننىڭ كەلەتىنىن ەشكىم بايقاماعان با؟
- مۇنى ەڭ الدىمەن ۇكىمەت قاراۋى قاجەت ەدى. دەپۋتاتتاردىڭ ماسەلەنى كوتەرگەننەن باسقا قولىنان ەشتەڭە كەلمەيدى. اتالعان ماسەلەنى ۇكىمەتكە جەتكىزدىك. ولار بولسا كەدەندىك وداققا مۇشە بولعاندىقتان ەشتەڭە ىستەي المايتىنىن ايتادى.
- قىرعىزستانداعى ۇن وندىرۋشىلەر قىرعىزستاندى تولىق قارجىلاندىرا المايدى ما؟
- قازاقستاندىق ءداندى داقىل قىرعىزستاندىكىمەن سالىستىرعاندا ساپالىراق ەكەن. وكىنىشكە وراي، ءبىز بۇكىل ەلدى ۇنمەن قامتاماسىز ەتە المايمىز. ءبىزدىڭ بيدايىمىز سۋدا وسىرىلەدى. ال قازاقتار سۋارىلمايتىن قۇنارلى جەردە وسىرەدى. ۇندى يمپورتتايتىنىمىز جاقسى، الايدا تاۋاردىڭ ساپالى بولۋىنا ءجىتى ءمان بەرۋىمىز كەرەك. ماسەلە اقشادا ەمەس. بۇل رەتتە ءسىز بەن ءبىزدىڭ دەنساۋلىعىمىز ماڭىزدى.
- قاجەتتى زاڭ قابىلداساق، قازاقستان ۇندى بايىتىپ ەكسپورتتايتىن بولا ما؟
- مەن زاڭ قابىلداۋ قاجەت ەكەنىن ايتقانمىن. كەدەن وداعىنا مۇشە بولعاننان كەيىن ۇن بويىنشا ارنايى ماماندار جۇمىس ىستەي باستايدى. ەگەر ەكونوميكا، دەنساۋلىق ساقتاۋ مينيسترلىگى ماسەلەنىڭ شەشىمىن تاپپاسا، حالقىمىز جاپپاي اۋىراتىن بولادى. مەنىڭ ويىمشا، ۇكىمەت جاقىن ۋاقىتتا قاجەتتى شارالاردى قولدانادى. مۇمكىن قازاقستان مەن قىرعىزستان شەكاراسىندا ارنايى اپپارات ورناتادى.
«قامشى» سىلتەيدى