قازاقستانعا ورالىپ جاتقان قازاق جاستارى كوپ - ومسكىلىك تانىمال سانگەر

 استانا. قازاقپارات - «ۆكونتاكتە» الەۋمەتتىك جەلىسىندەگى «ءبىز - رەسەيلىكتەرمىز» توبىندا ومسكىلىك تانىمال سانگەر ەرمەك حاپيزوۆ تاريحي وتاندارىنا ورالىپ جاتقان ومسكىلىك قازاقتاردىڭ قاراسى كوپتىگىن جازدى.

بۇل تۋرالى قازاقستاننىڭ رەسەيدەگى ەلشىلىگىنىڭ رەسمي سايتىندا حابارلاندى. حاپيزوۆتىڭ ايتۋىنشا، ولار قازاقستاندا وتباسىن قۇرىپ، جۇمىسقا ورنالاسۋدا. سولايشا، سىبىردەگى جەرلەستەرىنە ۇلگى بولىپ وتىر. «استاناعا كەلگەن سايىن، قازاقستان ەلورداسىنىڭ دامۋ قارقىنىنا تاڭدانامىن. كۇننەن- كۇنگە گۇلدەنىپ كەلە جاتقان استانامەن بىرگە ءبۇتىن ەل دە دامۋ ۇستىندە. رەسەي قازاقتارى بۇل جارقىن وزگەرىستەردى كورۋدە جانە جىل سايىن ءبىر عانا ومسكى وبلىسىنان قازاقستانعا جۇزدەگەن جاستار ورالۋدا. مۇندا ولار ءبىلىم الۋدا، جۇمىسقا ورنالاسىپ، وتباسىن قۇرىپ جاتىر. ونداي مىسالداردى جۇزدەپ كەلتىرۋگە بولادى. ولاردىڭ بارلىعى ومسكىلىك قازاق جاستارىن تاريحي وتاندارىنا ورالۋعا جىگەرلەندىرۋدە. قازاقستاننىڭ ءاربىر جەتىستىگىنە ءبىز شىن جۇرەكتەن قۋانامىز» ، - دەپ جازادى حاپيزوۆ.

حاپيزوۆ بۇل سوزدەرىن استانادا وتكەن ەكسپو-2017 كورمەسى كەزىندە دە ايتقان بولاتىن. سانگەر حالىقارالىق شاراعا بەلسەندى قاتىسىپ، ءتىپتى رەسەيلىك پاۆيلوننىڭ دەلەگاتسياسى ءۇشىن كيىم ۇلگىسىن تىككەن بولاتىن.