قازاقستاندا ەنگىزىلمەك مىندەتتەلگەن ساقتاندىرۋدىڭ ارتىقشىلىعى قانداي
بۇل تۋرالى بۇگىن ۇكىمەتتىڭ سەلەكتورلىق رەجيمدەگى وتىرىسىندا «ق ر- نىڭ كەيبىر زاڭنامالىق اكتىلەرىنە ساقتاندىرۋ جانە ساقتاندىرۋ قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرعان ەلىمىزدىڭ ۇلتتىق بانكى ءتوراعاسى دانيار اقىشەۆ ءمالىم ەتتى، دەپ حابارلايدى قازاقپارات.
«زاڭ جوباسىندا قازاقستاندا مىندەتتەلگەن ساقتاندىرۋدى ەنگىزۋ كوزدەلگەن. كوپتەگەن ەلدەردىڭ تاجىريبەسى ءداستۇرلى مىندەتتى ساقتاندىرۋدان مىندەتتەلگەن ساقتاندىرۋعا ءوتۋدى كورسەتىپ وتىر. مىسالى، فرانسيانىڭ زاڭناماسىندا مىندەتتى ساقتاندىرۋدىڭ 104 ءتۇرى بار. ونىڭ ىشىندە 4 ەۋى عانا ءداستۇرلى مىندەتتى ساقتاندىرۋعا جاتادى. قالعان 100 مىندەتتەلگەن ساقتاندىرۋ»، - دەدى د. اقىشەۆ.
ونىڭ تۇسىندىرۋىنشە، مىندەتتەلگەن ساقتاندىرۋدىڭ ارتىقشىلىعى ساقتاندىرۋ شارتى بولۋى تۋرالى تالاپتى زاڭنامالىق بەكىتۋ جانە ونىڭ ماڭىزدى تالاپتارى كەزىندە ساقتاندىرۋدىڭ ناقتى تالاپتارى ارنايى زاڭدا ەمەس، شارتتا بەلگىلەنگەندىگىندە.
«قازىرگى ۋاقىتتا مىندەتتەلگەن ساقتاندىرۋعا ۇقساس ساقتاندىرۋ كەدەن ءىسى تۋرالى كودەكستە جۇزەگە اسىرىلعان. وندا كەدەن وكىلىندە، ۋاقىتشا ساقتاۋ قويمالارىنىڭ يەلەرىندە ساقتاندىرۋ شارتىنىڭ بولۋى كوزدەلگەن. مۇنداي نورمالار «اتقارۋشىلىق ىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» زاڭدا دا بار. وندا جەكە سوت ورىنداۋشىسىندا ساقتاندىرۋ شارتىنىڭ بولۋى تالاپ ەتىلەدى. مىندەتتەلگەن ساقتاندىرۋدى ەنگىزۋ كليەنتتىڭ مۇددەسىن قورعايتىن ساقتاندىرۋدىڭ يكەمدى تالاپتارىن ەسكەرۋگە، ساقتاندىرۋ ونىمدەرىن جاقسارتۋعا جانە تاۋەكەلدەردىڭ ناقتى تىزبەسىن انىقتاۋعا مۇمكىندىك بەرەدى»، - دەدى د. اقىشەۆ.
اتالعان زاڭ جوباسى ۇكىمەت مۇشەلەرى تاراپىنان تولىق قولداۋعا يە بولعاننان كەيىن، ءبىر ايدىڭ ىشىندە ءماجىلىس قاراۋىنا ەنگىزىلمەك.