ۋحاندا قازاقستان مەن قىتاي وكىلدەرى كەدەرگىسىز سپۋتنيكتىك بايلانىستى قولدانىسقا ەنگىزۋدى جايىن تالقىلادى

استانا. قازاقپارات - قىتايدىڭ ۋحان قالاسىندا قازاقستان، رەسەي مەن قىتاي ەلدەرىنىڭ بايلانىس اكىمشىلىگىنىڭ ۇيلەستىرۋ كەزدەسۋى ءوتتى، دەپ حابارلايدى «قازاقپارات» ح ا ا ءتىلشىسى.

 ق ر ۇلتتىق بايلانىس جانە حابار تاراتۋ وپەراتورى - «رەسپۋبليكالىق عارىشتىق بايلانىس ورتالىعى» ا ق (ر ع ب و) ق ر بايلانىس اكىمشىلىگى دەلەگاتسياسىنىڭ قۇرامىندا قىتايلىق تاراپپەن كەلىسسوزدەر جۇرگىزدى.

«ر ع ب و» ا ق باسپا ءسوز قىزمەتىنىڭ اقپاراتى بويىنشا، ءۇشجاقتى كەزدەسۋ كەزىندە ءوزارا ءتيىمدى جاعدايدا «KazSat-2» جانە «Chinasat-12» سپۋتنيكتەرىن قولدانىسقا بەرۋدى قامتاماسىز ەتۋ ماسەلەلەرى تالقىلاندى.

«2011 -جىلى ۇشىرىلعان قازاقستاننىڭ «KazSat-2» جەر سەرىگى 86.5° شىعىس بويلىق وربيتالىق پوزيتسياسىندا تۇرسا، 2012 -جىلدىڭ سوڭىندا ۇشىرىلعان قىتايدىڭ «Chinasat-12» سپۋتنيگى 87.5° شىعىس بويلىقتا ورنالاسقان. ەكى عارىش كەمەسىنىڭ تۇرعان نۇكتەسىنىڭ اراسىندا ءبىر گرادۋس قانا ايىرماشىلىق بار، سوندىقتان ەكى سپۋتنيكتى دە «كەدەرگىسىز» قولدانىسقا بەرۋدى قامتاماسىز ەتۋ ماسەلەسى كوتەرىلدى»، - دەدى كەزدەسۋگە قاتىسقان «ر ع ب و» اق ۆيتسە-پرەزيدەنتى باۋىرجان قۇدابايەۆ.

قىتاي بايلانىس اكىمشىلىگىنىڭ وكىلى دۋ تينشان قازاقستان مەن رەسەي دەلەگاتسيالارىنىڭ كەزدەسۋگە قاتىسقاندارى ءۇشىن ريزاشىلىعىن ءبىلدىردى. بۇل كەزدەسۋدە قىتايلىق تاراپ باستاماشىلىق ەتتى، دەپ اتاپ ءوتتى رعبو باسپا ءسوز قىزمەتى.

كەزدەسۋ سوڭىندا تاراپتار وپەراتورارالىق دەڭگەيدە ۇيلەستىرۋشىلىك تالقىلاۋدى جالعاستىرۋ تۋرالى كەلىسىمگە كەلدى. 2018 -جىلى قازاقستان مەن قىتاي بايلانىس اكىمشىلىكتەرى بارلىق بايلانىس عارىش قۇرىلعىلارىنىڭ تەحنيكالىق پارامەترلەرى كورسەتىلگەن قۇجاتقا قول قويادى جانە ەكى سپۋتنيكتىڭ دە پايدالانۋ سيپاتتامالارى كەلىسىلەتىن بولادى.