داريعا نازاربايەۆا: مىقتى ارميا سوعىس ءۇشىن ەمەس، قورعانىس ءۇشىن قاجەت - فوتو
ايتا كەتەيىك، قىركۇيەكتىڭ 18-19 - كۇندەرى ق ر پارلامەنتى سەناتىنىڭ حالىقارالىق قاتىناستار، قورعانىس جانە قاۋىپسىزدىك كوميتەتى مەملەكەتتىك شەكارا كۇزەتى ماسەلەلەرى بويىنشا كوشپەلى كەڭەس وتكىزدى. داريعا نازاربايەۆا باستاعان ءبىرقاتار سەناتورلار الماتى مەن الماتى وبلىسىنداعى اسكەري وقۋ ورىندارى مەن شەكارا، كەدەن بەكەتتەرىندە بولدى.
بۇگىن قۇرلىق اسكەرلەرىنىڭ اسكەري ينستيتۋتى جۇمىسىمەن تانىسقاننان كەيىن، كوشپەلى كەڭەس ق ر ۇلتتىق قاۋىپسىزدىك كوميتەتى شەكارا قىزمەتى اكادەمياسىندا بولىپ، وندا دەپۋتاتتار كۋرسانتتار مەن وقىتۋشى قۇراممەن كەزدەستى. اكادەميادا سەناتورلار قارۋ- جاراق وقۋ كافەدراسى، كينولوگيا مەن شەكارا بەكەتىنەن وتكىزۋ پۋنكتىندە بولدى. اكادەميا جۇمىسىمەن تانىسقان داريعا نازاربايەۆا وقۋ ورنى باسشىلارىمەن اشىق سويلەسكەنىن ايتتى.
«وقۋ ورنى جاتتىعۋ قۇرالدارى، قارۋ- جاراقتارمەن قامتاماسىز ەتىلگەن. كۋرسانتتار جاڭا مەتوديكامەن دايىندالۋدا. بۇل - 85 جىلدىق تاريحى بار وقۋ ورنى. ءبىز ءوز تاراپىمىزدان زاڭ جاعىنان، سوسىن كۇزدە قاراجات ماسەلەسىن قارايمىز، سول كەزدە كومەك كورسەتەمىز دەپ ويلايمىز»، - دەدى سەناتور.
سونىمەن قاتار، ول بۇگىنگى سارباز ەلەكترونيكالىق قارۋ جابدىقتارىن عانا ەمەس، ەسكى تەحنيكانى دا جاقسى مەڭگەرگەنىمەن باعالى ەكەنىن ايتتى. «قازىرگى ۋاقىتتا دامىعان ەلدەردىڭ قارۋلى كۇشتەرى قىمبات تەحنيكالار مەن ەلەكترونيكامەن جابدىقتالۋدا. مەن قارۋلى كۇشتەرىمىز دە، ساربازدارىمىز دا كومپيۋتەردى، اقپاراتتىق تەحنولوگيانى يگەرىپ، بارىنشا ەلەكترونيكامەن جابدىقتالۋى كەرەك دەگەن پىكىردەمىن. ساردارلارمەن سويلەسكەنىمدە ولار بۇگىنگى سارباز ەلەكترونيكانى دا، بالاما تەحنيكانى دا يگەرۋى قاجەت دەگەن پىكىر ايتتى. سەبەبى، قارۋلى جاتتىعۋ كەزىندە ەلەكترونيكا ءوزىن ۇنەمى جاقسى جاعىنان كورسەتە بەرمەيدى. سوندىقتان، تيىمدىلىگى جوعارى ەسكى تەحنيكالاردى دا يگەرۋ ماڭىزدى. ەلىمىزدىڭ قورعانىس قابىلەتىن ارتتىرۋ وتە ۇلكەن قاراجاتتى قاجەت ەتەتىنىن بىلەمىز. مىقتى ارميا سوعىس ءۇشىن ەمەس، قورعانىس ءۇشىن قاجەت» - دەدى سەناتور.
سەناتورلار سونىمەن قاتار قۇرلىق اسكەرلەرىنىڭ اسكەري ينستيۋتىمەن تانىستى.
اۆتور: الماس مۇقاش ۇلى