استانا پروتسەسىندە بايقاۋشى بولعىسى كەلەتىن ەلدەر بەلگىلى بولدى

استانا. قازاقپارات - رەسەي پرەزيدەنتىنىڭ سيريا جونىندەگى ارناۋلى وكىلى الەكساندر لاۆرەنتيەۆ سيريا جانجالىن رەتتەۋ جونىندەگى استانا پروتسەسىنىڭ بايقاۋشىسى بولعىسى كەلەتىن ەلدەردى جاريا ەتتى، دەپ حابارلايدى قازاقپارات.

استانا پروتسەسىنىڭ 6-راۋندىن قورىتىندىلاۋعا ارنالعان بريفينگتە ول بەلگىلى ءبىر ەلگە الداعى ۋاقىتتا استانا پروتسەسىنە بايقاۋشى رەتىندە قاتىسۋ مۇمكىندىگى بەرىلەتىندىگىن ايتتى.

«ونى ديپلوماتيالىق ارنالار ارقىلى جۇمىس دەڭگەيىندە كەلىسۋگە شەشىم قابىلدادىق. ەگەر دە كەلىسىمگە كەلەتىن بولساق، وندا سايكەسىنشە ءوتىنىم بەرەمىز جانە قازاقستاندىق دوستارىمىز ارقىلى اتالعان ەلدەرگە شاقىرۋ جىبەرەمىز. استانا پروتسەسى اياسىندا بايقاۋشى ەل بولۋى ىقتيمال الەۋەتتى ەلدەردىڭ قاتارىندا قىتاي، ب ا ءا، مىسىر، يران جانە سيريامەن كورشىلەس ەل رەتىندە «دجيبات ان-نۋسرامەن» بىرلەسكەن كۇرەس جۇرگىزىپ جاتقان ليۆان بار. بۇل ەلدىڭ اۋماعىندا سيريالىق بوسقىنداردىڭ باسىم بولىگى شوعىرلانعان. ارينە، سوندىقتان دا ولار بۇل رەسپۋبليكادا بەيبىتشىلىك پەن تۇراقتىلىقتىڭ ورناعانىنا مۇددەلى»، - دەدى الەكساندر لاۆرەنتيەۆ.

ايتا كەتەيىك، بۇعان دەيىن ق ر سىرتقى ىستەر ءمينيسترى قايرات ءابدىراحمانوۆ سيريا بويىنشا استانا پروتسەسىنىڭ كەزەكتى 6-راۋندى ءوز مارەسىنە جەتكەندىگىن جاريا ەتكەنىن حابارلاعان ەدىك.

«قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ ۇزدىكسىز قولداۋىمەن جۇزەگە اسىرىلىپ كەلە جاتقان سيريا بويىنشا استانا پروتسەسىنىڭ كەزەكتى 6-راۋندى ءوز مارەسىنە جەتتى. كەلىسسوزدەرگە قاتىسقان جوعارى لاۋازىمدى دەلەگاتسيالار استانا پلاتفورماسىندا وسىعان دەيىن قول جەتكىزىلگەن ۋاعدالاستىقتاردىڭ ورىندالۋ بارىسىن تالقىلاپ، سيرياداعى داعدارىستى رەتتەۋ بويىنشا ءوزارا ءىس-قيمىلدى كەڭەيتۋ جولدارىن قاراستىردى»، - دەپ اتاپ وتكەن ەدى قايرات ءابدىراحمانوۆ.

اۆتور: مارلان جيەمباي