تۇركيانىڭ ءبىرىنشى حانىمى استانادا ساداق اتىپ كوردى - فوتو
07:36, 12 - قىركۇيەك 2017
استانا. قازاقپارات - «ەكسپو-2017» حالىقارالىق مامانداندىرىلعان كورمەسىنىڭ جابىلۋ سالتاناتىنا قاتىسۋ ءۇشىن قازاقستان استاناسىنا تۇركيا پرەزيدەنتى رەدجەپ تاييپ ەردوعان وتباسىمەن - جۇبايى ەمينە ەردوعانمەن جانە ۇلى نەدجمەددين بيلالمەن بىرگە كەلدى.
قوناقتار ەكسپو كورمەسىن عانا ەمەس، استانانىڭ كورىكتى جەرلەرىن دە ارالاپ، ەتنواۋىلعا باردى. تۇركيانىڭ قازاقستانداعى ەلشىلىگى فەيسبۋكتەگى رەسمي پاراقشاسىندا وسى ساپاردا تۇسىرىلگەن فوتولارمەن ءبولىستى، دەپ حابارلايدى قازاقپارات.
تۇركيانىڭ ءبىرىنشى حانىمى ۇلىمەن بىرگە ەتنواۋىلدا كيىز ۇيلەردى ارالاپ، قولونەر شەبەرلەرىنىڭ جۇمىستارىن تاماشالادى، قۇسبەگىلەرمەن اڭگىمەلەسىپ، ساداق تا اتىپ كوردى. ەمينە ەردوعان استانالىقتارمەن جانە قالا قوناقتارىمەن سۋرەتكە ءتۇسىپ، ۇلكەندەرگە قۇرمەت ءبىلدىردى.