ءالىپبي اۋىستىرۋدان ساياسي استار ىزدەۋشىلەر قاتەلەسەدى - ەردەن قاجىبەك
بۇگىن ماجىلىستە ءوتىپ جاتقان «مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ ءبىرىڭعاي ستاندارتىن ەنگىزۋ ماسەلەلەرى تۋرالى» پارلامەنتتىك تىڭداۋ كەزىندە احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى ەردەن قاجىبەك وسىلاي دەدى، دەپ حابارلايدى قازاقپارات.
ونىڭ ايتۋىنشا، بۇل تەك قانا ءتىلدىڭ رەفورماسى ەمەس - ءدىل رەفورماسى، جانىمىزدىڭ جاڭعىرۋى، ماڭىزدى ستراتەگيالىق باعدارلاما؛ بولاشاعىمىزدىڭ تىزگىنىن ءوز قولىمىزعا الۋدىڭ، پرەزيدەنت سوزىمەن ايتساق، «بولاشاققا باعدار»، «رۋحاني جاڭعىرۋدىڭ» وزەگى، قازاقستاننىڭ 30 دامىعان ەلدىڭ قاتارىندا ساپ تۇزەۋىنىڭ جارقىن كەپىلى.
ودان بولەك مامان بۇل باستاماعا تەك قازاقستاندىقتار عانا ەمەس، سىرتتاعى وتانداستارىمىز دا تىلەۋلەس بولىپ وتىرعانىن ايتتى.
«بۇل كەلەلى ماسەلە قالىڭ جۇرتشىلىقتىڭ بەلسەنە قاتىسۋىمەن قولعا الىنۋدا. ەلدىڭ تۇكپىر- تۇكپىرىنەن، شەتەلدەن، اۋىلدان دا، قالادان دا، حالىق قالاۋلىلارى مەن مەملەكەتتىك قىزمەتكەرلەر، عالىمدار مەن زەينەتكەرلەر، جاستار مەن سىرتتاعى وتانداستارىمىز - ءبارى دە ءوز ۇلەستەرىن قوسۋعا تىرىسۋدا، ءبارى دە باتالارىن بەرىپ، تىلەۋىن تىلەۋدە، حاتتارىن جازىپ، جوبالارىن جولداۋدا»، - دەيدى ەردەن قاجىبەك.
سونداي-اق، ول ءبىزدىڭ ءالىپبي اۋىستىرۋىمىزدىڭ نەگىزگى سەبەبى - تازا تىلدىك قاجەتتىلىككە تىكەلەي بايلانىستى ەكەندىگىن، بۇدان ساياسي استار ىزدەۋشىلەر قاتەلەسەتىنىن جەتكىزدى.
سپيكەردىڭ سوزىنشە، الفاۆيت قابىلداۋ - ايسبەرگتىڭ ۇشى، قىرۋار جۇمىستىڭ باستاماسى، العىشارتى عانا. ەلباسى اتاپ وتكەندەي، «الداعى 2 جىلدا ۇيىمداستىرۋ جانە ادىستەمەلىك جۇمىستار جۇرگىزىلۋگە ءتيىس.
«اتاپ ايتساق، ولار: جاڭا قازاق جازۋىنىڭ فونەتيكا- فونولوگيالىق نەگىزدەرىن جاڭادان ءتۇزىپ شىعۋ؛ لاتىن گرافيكاسى نەگىزىندەگى ءالىپبي بويىنشا قازىرگى قازاق جازۋىنىڭ ورفوگرافيالىق ەرەجەلەرىنىڭ نوبايىن ازىرلەۋ؛ جاڭا ءالىپبي نەگىزىندە تەرميندىك، ونوماستيكالىق، ەسكى جازبا كىتابي لەكسيكالىق بىرلىكتەردىڭ زاڭدىلىقتارىن ىرىكتەپ، بەكىتۋ؛ جاڭا ۇلتتىق ءالىپبيدى ۇيرەتۋگە ارنالعان وقۋلىقتاردى، مەڭگەرتۋگە ارنالعان ادىستەمەلىك وقۋ قۇرالداردى دايىنداۋ؛ تاجىريبەلىك- ۇيلەستىرۋ جانە بىلىكتىلىكتى ارتتىرۋ دارىستەر جۇيەسىن قالىپتاستىرۋ؛ مەكتەپكە دەيىنگى، ورتا جانە جوعارى ءبىلىم بەرۋ مەكەمەلەرى، ادىستەمەلىك- ۇيلەستىرۋ، عىلىمي، ءبىلىم بەرۋ ۇيىمدارىنىڭ وقۋشى-مۇعالىمدەرىن دايارلاۋ؛ جازۋ رەفورماسىنىڭ ۇلتتىق جانە مەملەكەتتىك ءتىل رەتىندەگى قازاق ءتىلىنىڭ ومىرشەڭدىگى مەن بولاشاعىنا يگى اسەر ەتەتىن مەحانيزمدەردى انىقتاپ، ەنگىزۋ؛ مەملەكەتتىك ءتىل ساياساتىنىڭ تيىمدىلىگىن ارتتىرۋ ماسەلەلەرىن ۇيىمداستىرۋ؛ اۆتوماتتى تۇردە كيريلل جازۋىنان لاتىن گرافيكاسىنا وزگەرەتىن ءارى لاتىن جازۋىن جەدەل تۇردە ۇيرەتۋگە باعىتتالعان موبيلدىك قوسىمشالاردىڭ ءىت باعدارلامالار كەشەنىن دايىنداۋ؛ عىلىمنىڭ ءار سالاسىنا ارنالعان ءبىر ءتىلدى، ەكى ءتىلدى، كوپ ءتىلدى سوزدىكتەردى جاساۋدى جانە ت. ب. ءىس- شارالاردى زەرتتەۋ، ساراپتاۋ، بەكىتۋ، ىسكە اسىرۋ»، - دەپ ءتۇيدى ءسوزىن ەردەن قاجىبەك.