وزبەكستاندا پالاۋ باسۋدان رەكورد ورناتىلدى

استانا. قازاقپارات - وزبەكستان استاناسى تاشكەنتتە پالاۋ باسۋدان رەكورد ورناتىلدى.

بۇل جولى اسپازدار ءبىر قازاندا 7 توننا 360 كەلى پالاۋ ءپىسىرىپ، جەتىستىكتەرىن گيننەستىڭ رەكوردتتار كىتابىنا جازدىردى، دەپ جازادى حابار 24.kz.

استى ازىرلەۋ ءۇشىن ءبىر جارىم توننا قوي ەتى، 1 توننا 900 كەلى كۇرىش، 2 جارىم توننادان استام ءسابىز بەن 220 كەلى پياز قوسىلعان. بۇدان بولەك، بىرنەشە دامدەۋىش تۇرلەرى تاعى بار. الا شاپاندى اعايىنداردىڭ ۇلتتىق اسى «وزبەگىم» (O'zbegim) دەپ اتالاتىن ءداستۇرلى مادەني فەستيۆال كەزىندە ازىرلەندى. ونى پىسىرۋگە ەلدىڭ تۇپكىر-تۇپكىرىنەن 50 اسپاز اتسالىسقان. ال دايىن بولعان ءدام فەستيۆال قوناقتارىنا بالالار جانە قارتتار ۇيىنە تاراتىلدى.

«وسى پالاۋدى كورۋ ءۇشىن بەكاباد قالاسىنان ارنايى كەلدىم. وزىممەن بىرگە وتباسىمدى، نەمەرەلەرىمدى دە ەرتىپ الدىم. ءارقاشان اسىمىز كوپ، جۇرتىمىز تىنىش بولسىن. ال مەملەكەتىمىز گۇلدەنە بەرسىن»، - دەدى فەستيۆال قوناعى كاريمدجون ابدۋراززوكوۆ.