ەكسپو ارقىلى الەم قازاقستاننىڭ باي مادەنيەتىمەن جاقىنىراق تانىستى - پرەزيدەنت

استانا. قازاقپارات - «ەكسپو-2017» حالىقارالىق كورمەسىن شامامەن 4 ميلليونعا جۋىق ادام كەلىپ تاماشالاعان.

بۇل تۋرالى كورمەنىڭ جابىلۋ سالتاناتىندا ق ر پرەزيدەنتى نۇرسۇلتان نازاربايەۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.

«ەكسپو-2017» حالىقارالىق كورمەسىن 4 ميلليونعا جۋىق ادام كەلىپ تاماشالاعان. ولاردىڭ ۇشتەن ەكىسى جاستار مەن وقۋشىلار. ەكسپو- قالاشىقتى كۇنىنە 40-50 مىڭ ادام كەلىپ كوردى. الەم قازاقستاننىڭ باي مادەنيەتىمەن جاقىنىراق تانىستى»، - دەدى ەلباسى.

مەملەكەت باسشىسى سونىمەن قاتار، «نۇر الەم» پاۆيلونىن 1 ميلليون 300 مىڭ ادام تاماشالاعانىن، سونداي-اق جالپى كورمەگە الەمنىڭ 180 ەلىنەن مەيمان كەلىپ كورگەنىن تىلگە تيەك ەتتى.

«كورمەگە كەلگەن مەيمانداردىڭ ءاربىر التىنشىسى شەتەلدىك ەكەنىن اتاپ وتكىم كەلەدى»، - دەدى نۇرسۇلتان نازاربايەۆ.

اۆتور: ايان بەكەن ۇلى