تۇركيانىڭ تاۋەلسىزدىگىمىزبەن قۇتتىقتاعانى ءالى ەسىمدە - نۇرسۇلتان نازاربايەۆ

استانا. قازاقپارات - قازاقستان مەن تۇركيانىڭ پرەزيدەنتتەرى اقوردادا وتكەن كەلىسسوزدەر بويىنشا بىرلەسكەن مالىمدەمە جاسادى.

نۇرسۇلتان نازاربايەۆ باۋىرلاس تۇرىك حالقىنىڭ قازاقستاننىڭ تاۋەلسىزدىگىمەن قالاي قۇتتىقتاعانىن ەسكە الدى، دەپ حابارلايدى قازاقپارات ءتىلشىسى.

«بيىل ەكى ەلدىڭ ديپلوماتيالىق قارىم- قاتىناستارىنا 25 جىل تولدى. 1991 -جىلى 16 -جەلتوقساندا كەشكى ساعات تورتتە ءبىز قازاقستاننىڭ تاۋەلسىزدىگىن جاريالادىق. سودان ءبىر ساعاتتىڭ ىشىندە تۇركيا پرەزيدەنتى ماعان تەلەفون شالىپ، قازاقستاننىڭ تاۋەلسىز بولۋىنا قۋانىشتى ەكەنىن، تۇرىك حالقىنىڭ قولدايتىنىن ايتتى. ءبىز ونى ەشقاشان دا ۇمىتپايمىز. سول شيرەك عاسىردان بەرى كەلە جاتقان ىنتىماقتاستىعىمىز ءالى دە جالعاسىپ كەلەدى. قازىر ول دوستىق، باۋىرلاستىق جانە سىندارلى بايلانىس رەتىندە دامىپ جاتىر»، - دەپ اتاپ كورسەتتى نۇرسۇلتان ءابىش ۇلى.

پرەزيدەنت ەكى ەل اراسىندا تولىق تۇسىنىستىك پەن سەنىم بار ەكەنىنە باسا نازار اۋداردى. قازاقستان مەن تۇركيا ستراتەگيالىق ىنتىماقتاستىق كەڭەسىن قۇردى. ءبىرقاتار ساۋدا- ەكونوميكالىق جانە ينۆەستيتسيالىق كەلىسىمدەر راسىمدەلدى. قازاقستاندا تۇرىك كاپيتالىنىڭ قاتىسۋىمەن 1600 دەن استام كاسىپورىن جۇمىس ىستەپ جاتىر.

«تۇركيا قازاقستاننىڭ ەڭ جاقىن ءارى سەنىمدى ساياسي- ەكونوميكالىق ارىپتەسى بولىپ سانالادى. ەكى ەلدىڭ اراسىنداعى تىعىز بالانىس ءار ۋاقىتتا قارقىندى داميدى، مەملەكەتتەرىمىزدىڭ مۇددەسىن كوزدەيتىن ەكىجاقتى جوعارى دەڭگەيدەگى كەزدەسۋلەر دە ءجيى وتكىزىلىپ تۇرادى. ءبىز پرەزيدەنت ەردوعان مىرزامەن جىل سايىن بىرنەشە رەت كەزدەسىپ وتىرامىز. بۇل ەكى ەلدىڭ اراسىنداعى ىنتىماقتاستىقتىڭ جوعارى ەكەنىن دالەلدەيدى»، - دەپ اتاپ كورسەتتى ەلباسى.