قازاق پەن تۇرىكتىڭ اراسىندا اعايىنشىلىقتان باسقا ماسەلە جوق - نۇرسۇلتان نازاربايەۆ

استانا. قازاقپارات - مەملەكەت باسشىسى نۇرسۇلتان نازاربايەۆ اقوردادا تۇركيا رەسپۋبليكاسىنىڭ پرەزيدەنتى رەدجەپ تايىپ ەردوعاندى قابىلدادى.

رەسمي شارادان كەيىن پرەزيدەنتتەر ەكىجاقتى كەزدەسۋ وتكىزدى، دەپ حابارلايدى قازاقپارات ءتىلشىسى.

«25 جىلدىڭ ىشىندە قازاقستان مەن تۇركيا اراسىندا اعايىنشىلىق قارىم- قاتىناستان باسقا ماسەلە بولعان جوق. ءسىزدىڭ سوڭعى ساپارىڭىز كەزىندە ءبىز ەكونوميكا، ەكىجاقتى قارىم- قاتىناس جونىندەگى ءبىراز ماسەلە بويىنشا كەلىستىك. جاسالىپ جاتقان جۇمىستار كوپ. ءبىزدىڭ وڭىرىمىزدە ءوز پروبلەمامىز بار، سىزدە دە بار. سونىڭ بارلىعىن كەڭىنەن تالقىلاپ اقىلداسۋعا بۇگىن مۇمكىندىگىمىز بار. ءسىز بەن پۋتيننىڭ سۇراۋىمەن سيريا ماسەلەسى بويىنشا جۇمىستار ءجۇرىپ جاتىر. 14 ىندە (قىركۇيەك - اۆت. ) تاعى ءبىر كەزدەسۋ بولادى»، - دەپ اتاپ كورسەتتى نۇرسۇلتان نازاربايەۆ.

 ءوز كەزەگىندە تۇركيا باسشىسى قازاق حالقىنىڭ، سونىڭ ىشىندە پرەزيدەنت نۇرسۇلتان نازاربايەۆتىڭ ايماقتىق شيەلەنىستەردى شەشۋ جولىنداعى ەرەن ەڭبەگىن ەرەكشە اتاپ ءوتتى. «ايماقتىق ماسەلەلەردى شەشۋدەگى ءسىزدىڭ، اقساقالىمىزدىڭ، جەكە باستامالارىڭىز ءۇشىن ەرەكشە العىسىمدى بىلدىرەمىن. 14-ىندە بولاتىن سيريا ماسەلەسى بويىنشا استانا كەلىسسوزدەرى وتە ماڭىزدى. ءبىراز جۇمىستار اياقتالدى دەپ ەستىگەنمىن. ەندى، ناقتى ءبىر ناتيجەگە كەلۋ كەرەك. قۇداي قالاسا، وسى قادامداردىڭ جەمىسىن استانادا كورەمىز. وسىلايشا، جەنەۆا پروتسەسى دە جەڭىلدەي تۇسەدى دەپ سەنەمىن»، - دەدى ەردوعان.