قانات يسلام مەن برەندون كۋكتىڭ جەكپە-جەگىن قايدان كورۋگە بولادى؟
9- قىركۇيەك كۇنى قازاقستاندىق قانات يسلام كاسىپقوي رينگتەگى 25-جەكپە-جەگىن وتكىزەدى.
قارسىلاسى - كانادالىق برەندون كۋك. استاناداعى «سارىارقا» سپورت كەشەنىندە وتەتىن كاسىپقوي بوكس كەشىن «Qazsport» تەلەارناسى ساعات 17:50-دەن، ال «Qazaqstan» ۇلتتىق تەلەارناسى ساعات 19:55-تەن باستاپ تىكەلەي ەفيردە كورسەتەدى. سونداي-اق، بوكس كەشىنە وتانداستارىمىز جانقوش تۇراروۆ، مەيىرىم نۇرسۇلتانوۆ، رۋسلان مىرساتايەۆ، ءالي احمەدوۆ، جانىبەك ءالىمحان ۇلى، ديماش نيازوۆ، ايدوس ەربوسىن ۇلى جانە نۇرسۇلتان جاڭابايەۆتىڭ قاتىسۋى جوسپارلانعان.
ايتا كەتەيىك، جەكپە- جەك «ەكسپو-2017» حالىقارالىق كورمەسىنىڭ اياسىندا وتەتىن بوكس كەشىنىڭ باستى كەزدەسۋى يسلام - كۋك جەكپە-جەگىنە تەك وتاندىق كورەرمەندەر عانا ەمەس، الىس-جاقىن شەتەلدەگى بوكسسۇيەر قاۋىم دا قىزىعۋشىلىق تانىتىپ وتىر.
قانات يسلام 1984-جىلدىڭ 13- قىركۇيەگىندە قىتايدا دۇنيەگە كەلىپ، قازاقستانعا 2010-جىلدارى كوشىپ كەلگەن. بۇعان دەيىن قانات اۋەسقوي بوكستا قىتاي قۇراماسىنىڭ ساپىندا بەيجىڭ وليمپياداسىنا قاتىسىپ، قولا مەدالعا يە بولعان. كاسىپقوي بوكسپەن 2012-جىلدان بەرى اينالىسىپ كەلەدى.
ەسكە سالا كەتەيىك، بۇگىن استاناداعى «حان شاتىر» ويىن-ساۋىق ورتالىعىندا قانات يسلام (24-0, 19 ك و) مەن ونىڭ قارسىلاسى - كانادالىق برەندون كۋك (18-0, 11 ك و) سالماق ولشەۋ راسىمىنەن ءوتتى.
تارازىعا الدىمەن برەندون كۋك شىعىپ، ونىڭ سالماعى 68,4 كەلىنى كورسەتتى. قانات يسلام بولسا، ودان ءبىر كەلىگە استى. «قازاقتىڭ» تازا سالماعى 69,6 كەلىنى قۇرادى. ءبىر كەلى ايىرماشىلىعىنا قاراماستان، ەكى بوكسشى دا ءبىرىنشى ورتا سالماقتىڭ مەجەسىنەن شىعا ءبىلدى.