ارىستاننىڭ ءتىلىن تاپقان ايەل

استانا. قازاقپارات - ەرتەدە ءبىر ايەل كۇيەۋىن قاتتى جاقسى كورەتىن بولىپتى. بىردە ول كۇيەۋىن قىزعانعاننان اۋىلىنىڭ عۇلاماسىنا بارىپ: - «ماعان كۇيەۋىم تەك مەنى جاقسى كورۋ ءۇشىن ءدارى جاساپ بەرىڭىز»، - دەپ ءوتىنىش جاسايدى.

ول مۇمكىن ەمەس ەكەنىن بىلسە دە عۇلاما وعان: - «ءدارى جاساپ بەرەيىن، تەك وعان ءتىرى ەركەك ارىستاننىڭ موينىنداعى قىلىنان كەسىپ الىپ كەل» - دەپتى. سودان الگى ايەل قىلدى اكەلۋگە بەل بۋىپ، اڭشىلارعا بارادى. ولاردان: - «ارىستانعا قالاي جاقىنداۋعا بولادى؟ « - دەپ سۇرايدى. العاشىندا بۇل سوزگە كۇلگەن اڭشىلار ايەلدىڭ العان بەتىنەن قايتپايتىنىن كورىپ: - «ونىڭ ءبىر عانا جولى بار، وعان ەت بەرۋ كەرەك» - دەپتى. الگى ايەل كۇندە ورمانعا ەت تاسىپ، الىستان ءبىر ەركەك ارىستاننىڭ جەپ جۇرگەنىن بايقاپ جۇرەدى.

ۋاقىت وتە ايەل ەتتى ارىستاننىڭ كوزىنە كورىنىپ، كەيىن جاقىنداپ بەرە باستايدى. ارادا ءبىر اي وتكەندە ارىستانعا ەتتى ءوز قولىمەن بەرە الاتىن دەڭگەيگە جەتەدى. ۇيرەنگەن ارىستاننىڭ موينىنداعى قىلىن قايشىمەن وپ- وڭاي كەسىپ الىپ، زۋىلداپ وتىرىپ عۇلاماعا بارادى. ايەلدىڭ اڭگىمەسىن ەستىگەن عۇلاما: - «ونداي ءدارى جاساۋ مۇمكىن ەمەس، ءبىراق ارىستاننىڭ ءتىلىن تاپقان ايەل كۇيەۋىنىڭ ءتىلىن مىندەتتى تۇردە تابا الادى. ارىستانعا نە ىستەسەڭ كۇيەۋىڭە دە سولاي ەت، ول اڭ ەمەس تىستەپ المايدى. سۇيگەن تاماعىن بەر، قاباعىن باعىپ، كوزىنە قۋانىش سىيلا. سوندا سەنەن باسقا ەشكىمدى جاقسى كورمەيتىن بولادى»، - دەگەن ەكەن.

Massaget.kz