بيبىگۇل تولەگەنوۆا ەسترادا جولىنا ءتۇسىپ كەتكەن رىمبايەۆا مەن ءجۇنىسوۆانى سىناپ تاستادى
حالىقارالىق «تۇركىستان» گازەتىنە بەرگەن سۇحباتىندا بيبىگۇل احمەت قىزى قازىرگى قازاق جۇلدىزدارىنان ديماشتى عانا مويىندايتىنىن ايتتى. سونداي- اق، ءوزىنىڭ ىزىنەن ەرگەن ماقپال ءجۇنىسوۆا مەن روزا رىمبايەۆا ەسترادا جولىنا ءتۇسىپ كەتتى دەپ قىنجىلدى.
«مەن ەسترادا انشىلەرىن ءتىپتى ءانشى دەپ سانامايمىن (وسىلاي دەپ بيبىگۇل احمەت قىزى شىدامسىزدانا قولىن ءبىر سىلتەدى). وسىلاي دەگەنىم ءۇشىن ولار ماعان رەنجيدى. «نەگە سولاي دەيسىز؟ » دەپ. مەن ولارعا: «سىزدەر ءانشى ەمەسسىزدەر، ورىنداۋشىسىزدار. ءسىزدىڭ ورىنداعانىڭىزدى كىم بولسا دا ورىندايدى. تويدا استا-توك تاماق ءىشىپ، قارنى تويىپ وتىرعان ادامعا بويىنداعى اسىن قورىتۋ ءۇشىن داڭعىر- دۇڭعىر مۋزىكا قوياسىڭدار» دەيمىن.
ەسترادا ءانشىسى دەپ ديماشتى ايتساق بولادى. مىنە، ناعىز ءانشى! قانداي ءانشى ول! جەر جۇزىنە اتى ءمالىم.
ەڭ وكىنىشتىسى، ەكىنىڭ ءبىرى ايتاتىن ءاندى ايتىپ جۇرگەن، كوپتىڭ ءبىرى بولاتىن انشىلەر كوپ. ال ونىڭ ىشىنەن ىرىكتەپ الاتىنى از. مىسالى، روزا رىمبايەۆا، ماقپال ءجۇنىسوۆا داۋسى بار انشىلەر ەدى، ولار دا ەسترادانىڭ جولىنا ءتۇسىپ كەتتى.
ال قازىرگىلەرگە قاراساڭ، نە ىستەپ تۇرعانى تۇسىنىكسىز، داڭعىر-دۇڭعىر، نە ايتىپ تۇرعانىن دا ەستىمەيسىڭ. «انا مۋزىكانىڭ داۋىسىن باسساڭدارشى، ءانشىنىڭ ءۇنىن ەستيىك تە» دەسەڭ، «اپاي، ءسىز بىلمەيسىز عوي، ولار «داۋسىن كوتەر» دەپ وزدەرى سۇراپ الادى» دەيدى. سوندا ولار ءوز داۋىسىنىڭ جەتىسپەگەن تۇسىن بىلدىرتپەس ءۇشىن مۋزىكانى نەعۇرلىم داڭعىرلاتىپ قويادى ەكەن. ال وپەرا انشىلەرىنە سۇيەمەلدەۋدىڭ قاجەتى جوق، كەز كەلگەن ۋاقىتتا مۋزىكاسىز دا ءان شىرقاي بەرەدى. مەنىڭ ءوزىم دە ءالى كۇنگە دەيىن «ءان سال» دەسە، كەز كەلگەن حالىق ءانىن ءوز داۋسىممەن ايتا بەرەم. ءانشى دەگەن سونداي بولۋى كەرەك»، - دەيدى بيبىگۇل تولەگەنوۆا.
بۇدان وزگە، بيبىگۇل تولەگەنوۆا قازىرگى ەسترادانى ناسيحاتتاپ، تەلەارنانى «وسەككە» تولتىرعانداردى سىنادى.
«قازىرگى ەسترادا - يۋ-قيۋ، داڭعازا مۋزىكا. جىن قاققان ادامداي جۇلىنىپ تۇرعانى ساحنادا. ولار ءان ايتپايدى، مۋزىكانى قويادى، ول مۋزىكا وزىمەن-ءوزى جۇرەدى، ال ولار سەكىرىپ، جۇلقىنىپ جۇرەدى. سەكىرىپ ءجۇرىپ كىم ءان ايتا الادى؟ ادامنىڭ تىنىسى تارىلىپ، القىنىپ قالادى. سەكىرىپ ءجۇرىپ ءان ايتپاق تۇگىلى، سويلەي دە المايسىڭ.
قازىر تەلەديدار قاراعاندا، ءبىر جاعىنان قارنىڭ اشادى، ءبىر جاعىنان ەلگە جانىڭ اشيدى. كونسەرتتىڭ ءبارى ىردۋ-دىردۋ، ايعاي-شۋ، ويىن-كۇلكى. اقىل سالاتىن، عيبرات الاتىن سالماقتى دۇنيەلەر از. قايداعى بىرەۋدى وتىرعىزىپ قويىپ، بىرەۋلەردى جاماندايدى، وسەك ايتادى. بۇل جامان نارسە. ءبىزدىڭ كەزىمىزدە مۇنداي نارسەلەر بولعان جوق. جاقسى ءاننىڭ ءوزى جاستارعا كۇش-ءنار بەرىپ، تاربيەلەيتىن. ال قازىر ۇرپاقتىڭ تاربيەسىن ويلاپ جاتقاندار از، ءوز قالتاسىنا پايدا ءتۇسۋىن عانا كوزدەيتىن سياقتى»، - دەدى ول.