ەكسپو-نىڭ جابىلۋ سالتاناتىندا بولاشاق الەم كورسەتىلەدى
10 -قىركۇيەك كۇنى وتەتىن مۋلتيمەديالىق شوۋدا «جاسىل» تەحنولوگيالار مەن كورمەگە قويىلعان ەڭ ۇزدىك جاڭالىقتار كورسەتىلەدى. وندا قوناقتار ەڭ ۇزدىك زاماناۋي جەتىستىكتەر ۇيرەنشىكتى بولىپ كەتكەن بولاشاق ءومىردى كورە الادى.
«قويىلىمدا ەكسپو-2017 كورمەسىنىڭ ادامزاتتىڭ بولاشاعىنا قالاي اسەر ەتەتىنىن، كورمەگە قويىلعان جاڭا ونەرتابىستاردىڭ كومەگىمەن الەمنىڭ قالاي وزگەرەتىنىن كورسەتەمىز. باستى رولدە ادام وينايدى. سەبەبى، ادام - تەڭدەسسىز تەحنولوگيالىق جەتىستىكتەردىڭ اۆتورى»، - دەيدى جابىلۋ سالتاناتىنىڭ باس پروديۋسەرى بوريسلاۆ ۆولودين.
ول شوۋدىڭ ادەمى عانا ەمەس، پايدالى دەرەكتەرگە تولى بولاتىنىن دا اتاپ ءوتتى. كورەرمەندەر الدىڭعى قاتارلى عىلىمي جاڭالىقتار مەن كورمە تۋرالى قورىتىندى ستاتيستيكالىق مالىمەتتەرگە قانىق بولادى.
تەاترلاندىرىلعان شوۋعا 2232 ادام قاتىسادى، ولاردىڭ اراسىندا ۆولونتەرلار مەن كورمەگە قاتىسۋشى ەلدەردىڭ وكىلدەرى بار.
كۇردەلى ينجەنەرلىك، قويىلىمدىق جانە كوركەم سۋرەتكەرلىك شەشىمدەر قولدانىلاتىن Hi-Light Show كورەرمەندەردى بولاشاق الەمگە جەتەلەيدى. اۋەدە قالقىپ تۇرعان دەكوراتسيالار گيمناستتارمەن بىرگە قوزعالادى، ساحنا ۇنەمى وزگەرىپ وتىرادى جانە مۇنىڭ بارلىعىن تانىمال كومپوزيتور الەكساندر كنيازيەۆتىڭ عاجاپ مۋزىكاسى سۇيەمەلدەيدى.
جابىلۋ سالتاناتىنىڭ تىكەلەي ترانسلياتسياسى «استانا ەكسپو-2017» رەسمي سايتىندا جۇرگىزىلەدى.