وزبەكستاندا قازاق مەكتەبى اشىلدى
وقۋ- ءبىلىم وشاعى ناۆوي وبلىسىنىڭ ءۇشقۇدىق اۋدانىنا قاراستى ءجۇزقۇدىق اۋىلىندا بوي كوتەردى.
بۇل تۋرالى 24.kz حابارلايدى.
ءبىلىم بەرۋ مەكەمەسى قاجەتتى قازاق ءتىلدى جانە باسقا دا وقۋلىقتارمەن، سونداي-اق ادەبيەتتەرمەن قامتاماسىز ەتىلگەن. ال كومپيۋتەرلىك سىنىپتا وقۋشىلاردىڭ اقپاراتتىق- كوممۋنيكاتسيالىق تەحنولوگيالاردى كەڭىنەن پايدالانۋىنا بارلىق جاعداي بار. مەكتەپ كابينەتتەرى زامان تالاپتارىنا ساي جابدىقتالدى.
قازاقستاننىڭ وزبەكستانداعى ەلشىلىگى مەن وسى ەلدەگى قازاق ۇلتتىق مادەني ورتالىعى ءبىلىم وشاعىنا قاجەتتى وقۋ قۇرالدارىن، پلانشەتتەر مەن قازاق تىلىندەگى 3 مىڭ كىتاپتى سىيعا تارتتى.
«بۇل جەردە ساباقتار قازاق تىلىندە جۇرەتىنى جانە قازاق وقۋلىقتارىنىڭ بارى قۋانتادى. اۋىل شالعايدا جاتسا دا، مۇندا بارىنشا جاعداي جاسالعان. مەكتەپ كومپيۋتەرلىك سىنىپپەن جابدىقتالدى. وزبەكستان پرەزيدەنتى وسىنداي سىي جاساپ وتىرعانىنا ريزامىز»، - دەيدى ق ر وزبەكستان رەسپۋبليكاسىنداعى توتەنشە جانە وكىلەتتى ەلشىسى ەرىك ۇتەمبايەۆ.