قازاقستان بۇكىل يسلام الەمى ءۇشىن زور ماڭىزعا يە - دجيبۋتي پرەزيدەنتى
كەزدەسۋدە مەملەكەت باسشىسى دجيبۋتي رەسپۋبليكاسىنىڭ پرەزيدەنتىن يسلام قارجىسى جونىندەگى جاھاندىق سىيلىققا يە بولۋىمەن قۇتتىقتادى.
«ءسىزدىڭ ساپارىڭىز «ەكسپو-2017» حالىقارالىق كورمەسىنىڭ وتۋىمەن تۇسپا- تۇس كەلدى. ەلىڭىز تاۋەلسىزدىكتىڭ 40 جىلدىعىن اتاپ ءوتتى. ءسىز بۇگىنگى سىيلىققا لايىقتىسىز. مەن ءسىزدى قۇتتىقتايمىن»، - دەدى قازاقستان پرەزيدەنتى.
نۇرسۇلتان نازاربايەۆ قازاقستاننىڭ افريكا ەلدەرىمەن ىنتىماقتاسۋعا زور ءمان بەرەتىنىنە توقتالىپ، دجيبۋتي رەسپۋبليكاسىنىڭ افريكا قۇرلىعىندا ماڭىزدى لوگيستيكالىق ورتا سانالاتىنىن اتاپ ءوتتى. يسمايل ومار گەللە كەزدەسۋگە ريزاشىلىق ءبىلدىرىپ، بۇل ونىڭ استاناعا كەلگەن ەكىنشى ساپارى ەكەنىن ايتتى. «مەن مۇندا العاش رەت 2011 -جىلى بولدىم. سول ۋاقىتتان بەرى قازاقستاننىڭ قارقىندى دامىپ، استانانىڭ تاڭعالارلىقتاي وزگەرگەنىن اتاپ وتكىم كەلەدى. بۇگىندە قازاقستان بۇكىل يسلام الەمى ءۇشىن زور ماڭىزعا يە بولىپ وتىر»، - دەدى دجيبۋتي رەسپۋبليكاسىنىڭ پرەزيدەنتى.