نۇرسۇلتان نازاربايەۆ قىتاي باستاماسىنا نە ءۇشىن قوسىلعانىن ايتتى

استانا. قازاقپارات - بۇگىن قازاقستان - پولشا بيزنەس فورۋمى اياسىندا مەملەكەت باسشىسى نۇرسۇلتان نازاربايەۆ پولياك كاسىپكەرلەرىنە قىتايدىڭ «ءبىر جول - ءبىر بەلدەۋ» باستاماسىنا قوسىلۋدىڭ سەبەبىن ءتۇسىندىرىپ بەردى.

وسى جيىنعا ەلىمىزگە مەملەكەتتىك ساپارمەن كەلگەن پولشا پرەزيدەنتى اندجەي دۋدا دا قاتىستى، دەپ حابارلايدى قازاقپارات ءتىلشىسى. «ءبارىڭىز جاقسى بىلەسىزدەر، قازاقستان ەۋرازيانىڭ قاق ورتاسىندا ورنالاسقان. ءبىز ۇلى جىبەك جولىنىڭ ءبىر بولىگى بولىپ سانالامىز. سول سەبەپتى قىتايدىڭ وسى باستاماسىنا («ءبىر جول - ءبىر بەلدەۋ» - اۆت. ) قوسىلدىق. وعان قوسىلىپ قانا قويماي، جىبەك جولىن كەڭىنەن دامىتۋعا اتسالىسۋدامىز. قىتاي شەكاراسىنان كاسپي تەڭىزىنە دەيىن اۆتوبان سالدىق. رەسەي ارقىلى ەۋروپاعا شىعاتىن تەمىرجول جەلىسى تاعى بار. بۇدان بولەك، وڭتۇستىككە قاراي باراتىن تەمىرجول توسەلدى. ونىمەن يران ارقىلى پارسى شىعاناعىنا شىعۋعا مۇمكىندىك بار. اتالعان باعىتتاردى قىتايلىق ارىپتەستەرىمىز ەمىن- ەركىن پايدالانا الادى»، - دەپ اتاپ كورسەتتى نۇرسۇلتان نازاربايەۆ.

 ايتا كەتەيىك، بۇگىنگى فورۋمدا مەملەكەت باسشىسى فارماتسيەۆتيكالىق سالانى دامىتۋ ماسەلەسىنە باسا نازار اۋداردى. ال پولشا باسشىسى اندجەي دۋدا 2022 -جىلعى ەكسپو ءۇشىن تالاستا قازاقستاننان قولداۋ ءبىلدىرۋدى سۇرادى.

 

 اۆتور: ارمان اسقاروۆ