بوكس: ا ق ش پوليسەيى ديماش نيازوۆ ەلورداداعى ايقاسىنا قاتىستى پىكىر ءبىلدىردى
ديماشتىڭ ۇلتى قازاق. ونىڭ قازاقستانداعى جەكپە- جەگى كاسىپقوي بوكستاعى تۇڭعىش ايقاسى. ول بوكس كەشى ءۇشىن ارنايى الىس قۇرلىقتان ۇشىپ كەلگەن. قانات يسلامنىڭ پروموۋتەرلەرى ءاۋ باستا ديماشقا تاجىريبەسى مول برازيليالىق بوكسشىمەن كەزدەسۋ وتكىزۋدى ۇسىنعان ەكەن. ديماش ءبىر اۋىزدان «قيىندىق جوق! شىعامىن» دەپ جاۋاپ بەرگەن. «قازاقستانعا قىركۇيەكتىڭ بىرىندە ۇشىپ كەلدىم. بۇل جاقتا اۋا- رايى امەريكا قۇرلىعىنان بولەك بولعاندىقتان، الدىن الا بەيىمدەلىپ الۋدى ءجون سانادىم. مەنىڭ قارسىلاسىم برازيليالىق ەدۋاردو پەرەيرو دوس رەيس وتە مىقتى بوكسشى دەپ ايتۋعا بولادى. 18 مارتە جەڭىسكە جەتكەن، 4 جەڭىلىسى بار. برازيلياداعى رەيتينگ بويىنشا بەسىنشى ورىندا. مەن ءۇشىن بۇل كەزدەسۋ بۇرىنعىلاردان گورى ەڭ كۇردەلىسى بولايىن دەپ تۇر. سەبەبى، ونىڭ تاجىريبەسى مەنەن ەكى ەسە كوپ. ءبىراق، قازاقستان حالقىنا مىقتىلىعىمدى تانىتۋ ءۇشىن وسى ايقاسقا شىعۋعا بەل بۋدىم» ، - دەيدى بوكسشى.
ديماش ءوز سوزىندە پسيحولوگيالىق تۇرعىدان سالماق ءتۇسىپ تۇرعانىن مويىندادى. ونىڭ ۇستىنە، بوكس كەشى وتەتىن «سارىارقا» ۆەلوترەگىنە بيلەتتەردىڭ بارلىعى ساتىلىپ كەتكەن. بۇل، 9 مىڭنان استام ورىنعا ارنالعان سپورت كەشەنى لىق تولى بولادى دەگەن ءسوز. «قازاقستانعا كوشكىڭىز كەلمەيدى مە؟ » ، - دەگەن سۇراققا: «البەتتە، كوشكىم كەلەدى. ءبىراق، كورەمىز.. .» ، - دەپ قىسقا قايىردى. «بۇرىنعى كەزدەسۋلەرىمنىڭ بارلىعى امەريكادا، ناقتىراق ايتقاندا، دەترويد پەن كاليفورنيادا وتكەندىكتەن، ول جاقتاعى فاناتتارىم مەن ءۇشىن تاقىم قىسىپ وتىر. اسىرەسە، ءوزىمنىڭ جۇمىسىم بويىنشا، پوليسەيلەر ەرەكشە قاناتتاندىرىپ جاتىر. ايقاستى كورگىسى كەلەدى. سول ءۇشىن بارىمدى سالامىن» ، - دەپ ءتۇيدى بوكسشى.
ەسكە سالا كەتسەك، 9 - قىركۇيەكتە ەلورداداعى «سارىارقا» ۆەلوترەگىندە كاسىپقوي بوكس كەشى وتەدى. باستى ايقاس - قانات يسلام مەن كانادالىق برەندون كۋكتىڭ اراسىندا بولماق. سونداي- اق بوكس كەشىنىڭ اندەركارتىندا جاڭقوش تۇراروۆ، جانىبەك ءالىمحان ۇلى، مەيىرىم نۇرسۇلتانوۆ، رۋسلان مىرساتايەۆ، ءالي احمەدوۆ، ايدوس ەربوسىن ۇلى، ديماش نيازوۆ پە رۋسلان جانابايەۆ شارشى الاڭعا شىعادى.
اۆتور: ايان بەكەن ۇلى