ميانما كوشباسشىسى قىرىلىپ جاتقان مۇسىلماندارعا قاتىستى العاش رەت پىكىر ءبىلدىردى
الايدا، ونىڭ ايتۋىنشا، قاقتىعىسقا قاتىستى وراسان جالعان اقپاراتتار اعىنى تەررورشىلار مۇددەسىنە قىزمەت ەتۋدە دەپ حابارلايدى شەتەلدىك ب ا ق- قا سىلتەمە جاساعان Baq.kz.
اۋن سان سۋ چجي باسپا ءسوز قىزمەتىنىڭ حابارلاۋى بويىنشا، ميانما ليدەرى بۇل تۋرالى تۇركيا پرەزيدەنتى رەجەپ تايىپ ەردوعانمەن ارادا تەلەفون ارقىلى بولعان اڭگىمەدە ايتقان. ول وكىمەتتىڭ راكحاين شتاتىنداعى بارشا حالىقتى قولدان كەلگەنشە قورعاۋعا العانىن جەتكىزگەن.
«ادامي قۇقىقتاردان ايىرىلۋ، دەموكراتيالىق تۇرعىدا قورعاۋ دەگەندەردىڭ نە ەكەنىن ءبىز ءبىر كىسىدەي، ءتىپتى كوبىنەن جاقسى بىلەمىز. سوندىقتان دا ءبىز ەلدەگى بارلىق ادامداردىڭ قۇقىعى قورعالۋىن، ساياسي عانا ەمەس، الەۋمەتتىك جانە ادامي تۇرعىدا قورعالۋىن قاداعالايمىز»، - دەگەن اۋن سان سۋۋ چجي.
سونىمەن قاتار ول بۇل قاقتىعىسقا قاتىستى جالعان اقپاراتتار مەن جالعان سۋرەتتەردىڭ قاپتاۋىن، ونداعى ماقسات قاۋىمدار اراسىندا پروبلەمالاردى ۋشىقتىرۋ جانە تەررورشىلاردىڭ مۇددەسى ەكەنىن ايتقان.
سوڭعى ەكى اپتادا ەلدىڭ سولتۇستىك-باتىسىنداعى راكحاين شتاتىنان 123 مىڭنان اسا ادام كورشى بانگلادەشكە قاشىپ بارعان.
باسىم بولىگى مۇسىلمان روحيندجا حالقى مەملەكەتى جوق ەڭ كوپ ساندى ەتنوس بولىپ سانالادى. ولار ميانمادا كوپ جىلدان بەرى قۋعىن-سۇرگىنگە ۇشىراپ كەلەدى.
ميانما ليدەرى اۋن سان سۋ چجي ەلدىڭ اسكەري ديكتاتۋراسىمەن ونداعان جىل ساياسي كۇرەس جۇرگىزىپ، 1991-جىلى كۇرەستىڭ بەيبىت جولىن تاڭداعانى ءۇشىن نوبەلدىڭ بەيبىتشىلىك سىيلىعىن العان بولاتىن.
سوڭعى كۇندەرى روحيندجا قىرعىنىنا قاتىستى ءۇنسىز وتىرعانى ءۇشىن ول حالىقارالىق قاۋىمداستىق تاراپىنان سىنعا ۇشىراعان ەدى.