پولشا پرەزيدەنتىنىڭ قازاقستانعا ساپارى جەمىستى بولدى - نۇرسۇلتان نازاربايەۆ
بۇل تۋرالى بۇگىن اقوردادا ەلباسى نۇرسۇلتان نازاربايەۆ پولشا پرەزيدەنتى اندجەي دۋدامەن كەڭەيتىلگەن قۇرامداعى كەلىسسوزدەردەن كەيىن بىرلەسكەن مالىمدەمە جاساۋ بارىسىندا ايتتى، دەپ حابارلايدى قازاقپارات.
«ەڭ الدىمەن مەنىڭ شاقىرتۋىمدى قابىل الىپ، قازاقستانعا رەسمي ساپارمەن تۇڭعىش رەت كەلىپ وتىرعان پولشا پرەزيدەنتىن شىن جۇرەكتەن قۇتتىقتايمىن، ساپارىڭىزعا تابىس تىلەيمىن. قازاقستان مەن پولشانىڭ 25 جىلدان بەرى ءداستۇرلى دوستىق، سەرىكتەستىك قاتىناستار بايلانىستىرىپ كەلەدى. مەن وتكەن جىلى بۇل ەلگە تۇڭعىش ساپارمەن بارىپ كەلگەنمىن. بۇل ساپار ەكى ەلدىڭ اراسىنداعى قارىم-قاتىناستى ۇلعايتۋعا ۇلكەن ۇلەس قوستى دەپ سانايمىن»، - دەدى نۇرسۇلتان نازاربايەۆ.
مەملەكەت باسشىسى پولشا پرەزيدەنتىنىڭ قازاقستانعا كەلۋى «ەكسپو-2017» كورمەسىنىڭ وتۋىمەن تۇسپا-تۇس كەلىپ وتىرعانىن، ەكىجاقتى تىعىز ىنتىماقتاستىق ۇكىمەتتەر، پارلامەنتتەر، مينيسترلىكتەر اراسىندا ناقتى دامىپ كەلە جاتقانىن ايتتى.
«پرەزيدەنت دۋدا ەكەۋىمىز 2016-جىلى ۆارشاۆادا بولعان جانە بۇگىن استانادا وتكەن كەلىسسوزدەر بارىسىندا ءوزارا ءتيىمدى ىنتىماقتاستىقتىڭ جاي-كۇيىن، بولاشاقتا نە ىستەۋ كەرەكتىگىن تالقىلادىق. قازىرگى كەلىسسوزدەرىمىز ناتيجەلى بولدى. ءبىز كوپتەگەن سالادا ەكىجاقتى ءىس-قيمىلدى ودان ارى ىلگەرىلەتىن بولامىز. تولىق پايدالانىلماي وتىرعان ساۋدا-ەكونوميكالىق ىنتىماقتاستىق ماسەلەلەرىنە باسا نازار اۋداردىق. قازاقستان نارىعىندا پولشا ىسكەرلىك توپتارىنىڭ سانى ارتىپ كەلەدى. بىزدە اسىرەسە اۋىل شارۋاشىلىعى، ەنەرگەتيكا، حيميا، كولىك، قۇرىلىس سالالارىندا 115 پولياك كاسىپورنى جۇمىس ىستەيدى. ازيا مەن ەۋروپا اراسىندا جۇك تاسىمالداۋ ماسەلەسىندە قازاقستان مەن پولشانىڭ كولىك-ترانزيت الەۋەتى الدىمىزدا تۇرعان مىندەت»، - دەدى ەلباسى.
سونىمەن قاتار قازاقستان پرەزيدەنتى كەلىسسوزدەر بارىسىندا عىلىم مەن ءبىلىم سالالارىنا دا ايرىقشا ءمان بەرىلگەنىن اتاپ ءوتتى.
«قازاقستاننىڭ 700 جاسى پولشانىڭ ۋنيۆەرسيتەتتەرىندە ءبىلىم الىپ جاتىر. حالىقارالىق ارەناداعى دا وزەكتى ماسەلەلەرگە جان-جاقتى توقتالدىق. جالپى العاندا پولشا پەرەزيدەنتىنىڭ ساپارى جەمىستى بولدى دەپ سانايمىن»، - دەدى نۇرسۇلتان نازاربايەۆ.
اۆتور: مارلان جيەمباي