الەمدەگى ەڭ قوناقجاي ەلدەر انىقتالدى

 استانا. قازاقپارات - الەمدەگى ەڭ قوناقجاي ەل - شىعىس افريكاداعى كومور مەملەكەتى بولىپ شىقتى.

قوناقجاي ەلدى انىقتاۋ كەزىندە ۆيزا ماسەلەسىنە باستى نازار اۋدارىلعان. قانشا مەملەكەتتىڭ ازاماتتارىنا ۆيزاسىز كىرۋگە مۇمكىندىك بار، كىرۋگە ەلەكتروندى رۇقسات نەمەسە كەلىسىمەن ۆيزا راسىمدەۋ جاعى قاراستىرىلعان- قاراستىرىلماعانى، وسى سەكىلدى تاعى باسقا سۇراقتارعا جاۋاپ ىزدەلدى.

كومور ەلى 103 پوزيتسيادان قۇرالعان رەيتينگتىڭ كوشىن باستاعان. بۇل مەملەكەتتە 198 ەلدىڭ تۇرعىندارى ءۇشىن جەڭىلدەتىلگەن ءتارتىپ قاراستىرىلعان. بۇل ەلمەن قوسا رەيتينگتىڭ باسىندا كوت- د'يۆۋار، گۆينەيا- بيساۋ، ماداگاسكار، مالديۆى، ماۆريتانيا، ميكرونەزيا فەدەراتيۆتى شتاتتارى، موزامبيك، ساموا، سەيشەل، شىعىس تيمور، توگولەز رەسپۋبليكاسى، تۋۆالۋ جانە ۋگاندا تۇر.

ەكىنشى ورىنعا كابو- ۆەردە مەن دومينيكا جايعاسقان. قوس ەلدە 197 مەملەكەتتىڭ ازاماتتارى ءۇشىن جەڭىلدەتىلگەن ۆيزا رەجيمى ەنگىزىلگەن ەكەن. ەڭ قوناقجاي ەلدەردىڭ ۇشتىگىن پالاۋ تۇيىقتاپتى. بۇل رەسپۋبليكانىڭ كورسەتكىشى - 196 مەملەكەت.

ءتورتىنشى ساتىعا دجيبۋتي ورنالاسسا، بەسىنشى ورىن - گايتيگە بۇيىرعان ( تيىسىنشە 195 جانە 194 ەل) . ۇزدىك وندىققا، سونداي- اق، ماكاو (ق ح ر- دىڭ ارنايى اۋدانى) ، سەنت- ۆينسەنت پەن گرەنادينى، كامبودجا، نەپال مەن ەكۆادور كىرگەن.

ال قازاقستان اتالعان رەيتينگتە 75- ورىنعا جايعاسقان. ەلىمىزدە 60 ەلدىڭ ازاماتتارى ءۇشىن جەڭىلدەتىلگەن ۆيزا رەجيمى ەنگىزىلگەن ەكەن.

كورشىلەس رەسەي 83- ورىنعا تۇراقتاپتى. بۇل ەلگە 42 مەملەكەتتىڭ ازاماتتارى جەڭىلدەتىلگەن تارتىپپەن كىرە الادى

Baq.kz