قازاقستانداعى قار بارىسىنىڭ سانى قانشا؟
20:36, 04 - قىركۇيەك 2017
استانا. قازاقپارات - ق ر ا ش م ورمان شارۋاشىلىعى مەن جانۋارلار دۇنيەسى كوميتەتى ءتوراعاسىنىڭ ورىنباسارى قايرات ۇستەمىروۆ قازاقستاندا مەكەندەيتىن قار بارىسىنىڭ مولشەرلى سانىن اتادى، دەپ حابارلايدى «قازاقپارات» ح ا ا ءتىلشىسى.
«سوڭعى 10 جىلدىڭ ىشىندە قار بارىسىن اۋلاۋ فاكتىسى ەلىمىزدە تىركەلگەن جوق. قازىر قازاقستاننىڭ بيىك تاۋلى وڭىرلەرىندە فوتوتۇزاقتار قويىلىپ، ناقتى قار بارىسىنىڭ سانىن انىقتاۋ بويىنشا جۇمىستار ءجۇرىپ جاتىر. بۇگىنگى تاڭدا قازاقستاندا شامامەن 138 قار بارىسى بار دەپ بولجام جاساپ وتىرمىز»، - دەيدى كوميتەت وكىلى.
قايرات ۇستەمىروۆتىڭ ايتۋىنشا، شىمكەنتتەگى سايرام-وگەم مەملەكەتتىك ۇلتتىق تابيعي پاركىندەگى فوتوتۇزاققا جۋىقتا قار بارىسى ءتۇسىپ قالعان. الماتى ءوڭىرى جانە شىعىس قازاقستان وبلىسىنىڭ كاتونقاراعاي اۋدانىنداعى ۇلتتىق پاركتەردە ورناتىلعان فوتوتۇزاقتار دا ول وڭىرلەردە قار بارىسىنىڭ مەكەندەيتىنىن دالەلدەپ وتىر.
اۆتور: ايان بەكەن ۇلى