رەسەيمەن شەكارالاس قازاقستان جولدارى اقىلى بولادى

استانا. قازاقپارات - ق ر ينۆەستيتسيالار جانە دامۋ مينيسترلىگىنىڭ رەسمي وكىلى مۇرات جۇمانباي الداعى ۋاقىتتا اقىلى بولاتىن اۆتوجولداردىڭ ءتىزىمىن جاريالادى، دەپ حابارلايدى قازاقپارات.

ونىڭ سوزىنە قاراعاندا، اعىمداعى جىلى «استانا-تەمىرتاۋ» (132 شاقىرىم) مەن «الماتى- قاپشاعاي» (42 شاقىرىم) جولدارىندا تولەم قابىلداۋ جۇيەسىن مونتاجداۋ جۇمىستارى باستالدى. ەكىنشى جارتىجىلدىقتا «الماتى-قورعاس» (295) اۆتوجولىندا جۇيەنى قۇراستىرۋ شارالارىن باستاۋ جوسپارلانىپ وتىر.

جىل سوڭىنا قاراي اتالعان ۋچاسكەلەردە جۇيەنى ىسكە قوسۋ كوزدەلگەن. «سونىمەن بىرگە جىلدىڭ اياعىنا دەيىن 5,5 مىڭ شاقىرىم جولعا اقىلى جۇيەنى ەنگىزۋگە جوبانى دايارلاۋ جۇمىستارىن اياقتاۋ جوسپارلانعان («قاپشاعاي-تالدىقورعان»، «استانا-قوستاناي-ر ف شەكاراسى»، «پاۆلودار-ر ف شەكاراسى»، «اقتوبە-ورال-ر ف شەكاراسى»، «اتىراۋ-دوسسور- بەينەۋ-اقجىگىت-وزبەكستان شەكاراسى»، «ر ف شەكاراسى-اقتوبە- قىزىلوردا»، «تاراز- قاينار»، «شۋچينسك-كوكشەتاۋ-پەتروپاۆل-ر ف شەكاراسى»، «ورال-ر ف شەكاراسى»، «استانا- پاۆلودار»، «اقتاۋ-بەينەۋ»، «قىزىلوردا-شىمكەنت-تاراز»، «شىمكەنت-وزبەكستان شەكاراسى»)»، - دەپ جازدى رەسمي وكىل.

ونىڭ ايتۋىنشا، اقىلى ءتارتىپتى ەنگىزۋ مەن جۇيەنى ارى قاراي پايدالانۋ اياسىندا ەۋروپالىق قايتا قۇرۋ جانە دامۋ بانكى قاراجاتىنىڭ ورتاق قارجىلاندىرۋىمەن الەمگە تانىمال كومپانيالاردان ينۆەستيتسيا تارتۋ كوزدەلگەن. قازىرگى ۋاقىتتا «قازاۆتوجول» ۇ ك تاراپى 150 ميلليون ا ق ش دوللارىنا ە ق ق د ب زايمىن تارتۋ بويىنشا جۇمىستاردى جۇرگىزۋدە. جالپى 6,5 مىڭ شاقىرىم جولدى اقىلى جۇيەگە اۋىستىرۋ كوزدەلگەن.