يراكتىڭ سوعىس ايماعىنان شىعارىلعان وتانداستارىمىز ەلگە جەتتى
بۇل تۋرالى ق ر سىرتقى ىستەر مينيسترلىگىنىڭ باسپا ءسوز حاتشىسى ءانۋار جايناقوۆ فەيسبۋكتەگى پاراقشاسىندا جازدى، دەپ حابارلايدى قازاقپارات.
«يراكتىڭ سوعىس ءجۇرىپ جاتقان ايماعىنان رەسەيلىك تاراپتىڭ كومەگىمەن شىعارىلعان قازاقستاننىڭ 4 ازاماتى وتانىنا ورالدى. ولاردىڭ اراسىندا 1985-جىلى دۇنيەگە كەلگەن ايەل مەن ونىڭ كامەلەتكە تولماعان ءۇش بالاسى بار. قازاقستان ازاماتى سانالاتىن تاعى 3 بالا مەن ولاردىڭ رەسەي ازاماتشاسى سانالاتىن اناسى گروزنىي قالاسىنا جەتكىزىلدى. ولار قازىرگى ۋاقىتتا دا سول جەردە. ەكى وتباسى دا اقتاۋ قالاسىنىڭ تۇرعىندارى»، - دەپ جازدى ول.
مينيسترلىك وكىلىنىڭ سوزىنە قاراعاندا، قالعان قازاقستاندىقتار ءالى دە يراكتا. قازىرگى ۋاقىتتا قازاقستاننىڭ يوردانياداعى كونسۋلى ولاردى وتاندارىنا قايتارۋ ماسەلەسىمەن اينالىسۋدا. «قوسىمشا اقپارات ءسال كەيىنىرەك بەرىلەتىن بولادى»، - دەدى جايناقوۆ.
اۆتور: مارلان جيەمباي