الماتى اۋەجايىندا جولاۋشىنىڭ قالتاسىنان ەسىرتكىگە ۇقساس زات تابىلدى
17:54, 02 - قىركۇيەك 2017
الماتى. قازاقپارات - الماتى اۋەجايىندا جولاۋشىنىڭ قالتاسىنان ەسىرتكىگە ۇقساس زات تابىلدى، دەپ حابارلايدى قازاقپارات ءتىلشىسى اۋەجايدىڭ باسپا ءسوز قىزمەتىنە سىلتەمە جاساپ.
كۇدىكتى جولاۋشى الماتىدان اتىراۋعا باعىت العان رەيسكە وتىرماق بولعان.
اۋە قاۋىپسىزدىگى قىزمەتىنىڭ باقىلاۋشىلارى جەرگىلىكتى ۇشۋ تەرمينالىندا جولاۋشىنىڭ قالتاسىن تەكسەرە كەلە جاسىل ءتۇستى ەسىرتكىگە ۇقساس زاتتى تاپتى.
ەر ادام بىردەن اۋەجايداعى پوليتسيانىڭ جەلىلىك بولىمىنە جەتكىزىلدى. تاركىلەنگەن زات سوت ساراپتاماسى ينستيتۋتىنا تالداۋعا جىبەرىلدى. تاجىريبەلى تەرگەۋشىلەردىڭ ايتۋىنشا، ول وسىمدىكتەن جاسالعان ەسىرتكى بولۋى مۇمكىن.