الماتىلىقتار قۇربان ايت مەرەكەسىن سپورت شاراسىمەن اتاپ ءوتتى

استانا. قازاقپارات - قاسيەتتى «قۇربان ايت» كۇنىنە وراي الماتى قالاسىنىڭ ورتالىق مەشىتىندە «اسىل مۇرا» باعدارلاماسىنىڭ اياسىندا شاھار تۇرعىندارى مەن قوناقتارىنا ارنالعان مادەني جانە سپورتتىق شارا ءوتتى، دەپ حابارلايدى اقپاراتتىق جانە سپورتتىق حاب.

ورتالىق مەشىتكە كەلگەن 5000 عا جۋىق جاماعات مەرەكەلىك شارانىڭ كۋاگەرى عانا بولماي، ءتۇرلى سپورتتىق جارىستارعا قاتىسۋعا مۇمكىندىك الدى.

مەرەكە اياسىندا «اسىل مۇرا» بىرەگەي باعدارلاماسىن بىرىكتىرەتىن كەشەندى مادەني- ساۋىقتىرۋ جانە سپورتتىق شارالار بارلىق قاتىسۋشىلارعا مەرەكەلىك كوڭىل-كۇي مەن ەستەن كەتپەس كۇن سىيلادى. مەشىتكە كەلۋشى جاماعاتتار ۇلتتىق سپورت تۇرلەرىنەن باقتارىن سىنادى. اتاپ وتسەك، اسىق اتۋ، قوشقار كوتەرۋ، ارقان تارتۋ جانە ارمرەستلينگتەن باستەستى.

سونىمەن قاتار، ايت-نامازدان كەيىن كورەرمەندەر «دومبىرا» ءانسامبلىنىڭ ۇلتتىق اسپاپتارداعى تۋىندىلارىن تىڭداپ، «توپ جارعان» اكروباتتارىنىڭ ونەرىن تاماشالادى. سپورتتىق سايىستاردىڭ جەڭىمپازدارى مەن جۇلدەگەرلەرى ۇيىمداستىرۋشىلار اتىنان باعالى سىيلىقتارمەن ماراپاتتالدى.

قوشقار كوتەرۋدەن توپ جارعان التىنبەك قۇدايبەرگەنوۆ بۇگىنگى كۇننەن العان اسەرىمەن ءبولىستى:

- مەن وسى سىيلىقتى جەڭۋ ءۇشىن تىرىسىپ باقتىم. اللاعا شۇكىر، دەگەنىمە جەتتىم. قوشقاردى 150 رەت كوتەردىم. ارينە، قيىن بولدى، ءبىراق، مەن كۇن سايىن دايىندالامىن. ءوزىم كۇرەسپەن اينالىسامىن. سونىمەن بىرگە، بۇگىن گىر كوتەرۋدەن ەكىنشى ورىندى جەڭىپ الدىم، - دەپ ۇيىمداستىرۋشىلارعا العىسىن ءبىلدىردى.

سونداي-اق، قوناقتارعا تاعامدار مەن سۋسىندار تەگىن تاراتىلدى. مەرەكەلىك شارا ورتالىق مەشىتتىڭ نايب-يمامى جوراباي دۋلاتبايەۆتىڭ قۇتتىقتاۋ سوزىمەن ءوز مارەسىنە جەتتى.

ايتا كەتەر جايت، الماتى مەشىتتەرىنىڭ كەلۋشىلەرى اراسىندا بۇقارالىق سپورتتى دامىتۋعا باعىتتالعان «اسىل مۇرا» باعدارلاماسى وسى جىلى ىسكە قوسىلىپ، مەشىتكە كەلۋشى جاماعاتتار اراسىندا سالاۋاتتى ءومىر سالتىن ناسيحاتتاۋدا. قۇربان ايت - مۇسىلمانداردىڭ ەڭ ماڭىزدى مەرەكەلەرىنىڭ ءبىرى، ول ورازا اياقتالعاننان كەيىن، 70-كۇنى تويلانادى.

وسى جىلى قۇربان ايت قىركۇيەكتىڭ 1 ءى كۇنى باستالىپ، ءۇش كۇنگە جالعاسادى.