قازاقستان شاحتاسىندا قازا تاپقانداردىڭ وتباسىلارىنا ون جىلدىق ەڭبەكاقى تولەنەدى
مۇنداي اقشالاي وتەماقى ۇجىمدىق ەڭبەك كەلىسىمشارتىندا قاراستىرىلعان. بۇدان وزگە، قازا تاپقان ازاماتتاردىڭ تۋىستارىنا شيپاجايلىق- مەديتسينالىق مەكەمەلەرگە جولداما بەرىلەدى. جۇمىس بەرۋشى قازا تاپقانداردىڭ بالالارىنىڭ مامانداندىرىلعان ورتا جانە جوعارى وقۋ ورىندارىندا ءبىلىم الۋىن قارجىلاندىرۋعا مىندەتتى.
كومپانيا تەك كەلىسىمشارتتاعى تالاپتارمەن شەكتەلىپ قالماق ەمەس. كومىر دەپارتامەنتىنىڭ قىزمەتشىلەرىنىڭ ارنايى توبى ءار وتباسىنا قانداي كومەك كەرەكتىگىن انىقتاۋمەن اينالىسىپ جاتىر.
قاجەت بولعان جاعدايدا، قايتىس بولعان ازاماتتاردىڭ بانكتەردەن العان نەسيەلەرى تولەنەتىن بولادى. كەنشىلەردى جەرلەۋ ءراسىمىنىڭ شىعىنىن دا «ارسەلورميتتال تەمىرتاۋ» كومپانياسى تولىقتاي ءوز موينىنا الدى.
«ارسەلورميتتال تەمىرتاۋ» كومپانياسىنىڭ باسشىسى پارامجيت كالون قايتىس بولعانداردىڭ وتباسىلارىنا كەلىپ، كوڭىل ايتتى. ول قارالى وتباسىلارىنا ۇجىمدىق كەلىسىمشارتتا قاراستىرىلعان بارلىق مىندەتتەمەلەردىڭ ورىندالاتىندىعىنا ۋادە ەتتى. بۇدان وزگە، كومپانيا باسشىلىعى ءار وتباسىنىڭ الەۋمەتتىك جاعدايىن انىقتاپ، سونىڭ نەگىزىندە تاعى دا قوسىمشا كومەك كورسەتىلەتىندىگىن ايتتى.
2- قىركۇيەك كۇنى «ارسەلورميتتال تەمىرتاۋ» اق كومپانياسىنىڭ ءۇش بولىمشەسىندە قازا تاپقان ازاماتتاردى ءبىر مينۋت ۇنسىزدىكپەن ەسكە الۋ شاراسى وتكىزىلەدى. سول كۇنى، 2- قىركۇيەكتە ولار جەر قوينىنا بەرىلەدى.
ايتا كەتەرلىگى، بۇگىن دارىگەرلەر مەتاننان ۋلانىپ قالعان 26 جاسار كەنشىنى ۇيىنە قايتاردى. توتەنشە جاعدايلار كوميتەتىنىڭ حابارلاۋىنشا «31- تامىزدا تاڭعى ساعات 4 تەر شاماسىندا قاراعاندى وبلىسى شاحتينسك قالاسىنداعى «ارسەلور ميتتال تەمىرتاۋ» كومپانياسىنا تيەسىلى «قازاقستان» شاحتاسىندا كەنەت مەتان گازى تاراعان.
شاحتادا باستاپقى مالىمەت بويىنشا 136 ادام بولعان. ال اپاتتى ۋچاسكەدە الدىن الا دەرەككە سايكەس 4 ادام قالعان. قازىرگى ۋاقىتتاعى قولدا بار دەرەك بويىنشا شاحتا قىزمەتكەرلەرى تىرشىلىك بەلگىسى جوق 3 ادامدى تاپقان». كەيىن اپاتتا قازا تاپقان ءۇش كەنشىنىڭ اتى ءجونى جاريا ەتىلدى.