وڭتۇستىك قازاقستان ديقاندارى قۇربان ايتقا وراي جاعدايى تومەن وتباسىلارعا تەگىن قاۋىن- قاربىز تاراتتى - فوتو

استانا. قازاقپارات - وڭتۇستىك قازاقستان وبلىسىنىڭ ديقاندارى «قۇربان ايت» مەرەكەسىنە وراي استانا قالاسىنداعى 200 الەۋمەتتىك جاعدايى تومەن وتباسى مەن 3 ارنايى الەۋمەتتىك كومەك كورسەتۋ مەكەمەسىنە تەگىن قاۋىن- قاربىز تاراتتى، دەپ حابارلايدى وبلىستىق اكىمدىكتىڭ باسپا ءسوز قىزمەتى.

ونداعى ماقسات - حالىقتىڭ ءال- جۋاز توبىنا قولداۋ كورسەتىپ، وڭتۇستىكتىڭ جەرىندە وسكەن تاتتىلىگى ءتىل ۇيىرەر قاۋىن - قاربىزدان ءدام تاتقىزۋ.

 

ءتىزىمدى ديقاندارعا استانا قالاسى اكىمدىگىنىڭ «الەۋمەتتىك قىزمەت كورسەتۋ ورتالىعى» مەملەكەتتىك مەكەمەسى بەرىپتى. وسىلايشا شارۋالار وڭتۇستىك قازاقستاندىقتاردىڭ دارحاندىعى مەن ەڭبەكقورلىعىن كورسەتىپ، ەرتەڭگى ۇلىق مەرەكەنىڭ قادىر- قاسيەتىن ارتتىرا ءتۇستى.

 

ايتا كەتەيىك، استانا قالاسىندا 2-3 -قىركۇيەك كۇندەرى «ەكسپو - 2017» حالىقارالىق كورمەسىنە ارنالعان وڭتۇستىك قازاقستان وبلىسى اۋىل شارۋاشىلىعى ونىمدەرىنىڭ جارمەڭكەسى وتكىزىلەدى. «قازاقستان» سپورت الاڭشاسىندا وتەتىن جارمەڭكەگە قۇنى 265 ميلليون تەڭگە بولاتىن 500 توننادان استام اۋىل شارۋاشىلىعى ءونىمى ۇسىنىلاتىن بولادى.