وسى ورايدا استانا اكىمدىگى «قازاقپارات» اگەنتتىگىنە بۇل قۇرىلعىلار قانداي قۇقىقبۇزۋشىلىقتاردى تىركەيتىندىگى تۋرالى مالىمەت بەردى.
«قازىرگى كەزدە ورناتىلىپ قويعان بەينەكامەرالار تەستىلىك رەجىمدە جۇمىس ىستەپ تۇر، سوندىقتان ايىپپۇل ازىرگە قاراستىرىلمايدى. بەينەباقىلاۋ كامەرالارى تولىق جۇمىس ىستەي باستاعان كەزدە قالا تۇرعىندارىن الدىن الا ەسكەرتەتىن بولامىز. بۇگىندە بەينەجازبالار ۇنەمى دامۋ ۇستىندەگى قالالاردا تيىمدىلىگىن ءارى قاجەتتىگىن كورسەتتى»، - دەلىنگەن اكىمدىك مالىمەتىندە.
اتاپ ايتقاندا، ءبىر باعانعا وسىنداي كامەرالاردىڭ ۇشەۋى نەمەسە تورتەۋى قاتارىنان ورناتىلىپ جاتقانى بەلگىلى. جالپى، بۇل قۇرىلعىلار قانداي ەرەجە بۇزۋ ارەكەتتەرىن باقىلايتىنى بەلگىلى بولدى. استانالىق قۇقىق قورعاۋ ورگاندارىنىڭ بايقاۋىنشا، بەينەباقىلاۋلار جۇيەسىنىڭ قالاداعى وپەراتيۆتىك جاعدايعا، قوعامدىق ءتارتىپتى قورعاۋعا جانە جول قاۋىپسىزدىگىنە تيگىزگەن سەپتىگى زور.
جالپى، بۇل قۇرىلعىلار نومىرلەردى، جىلدامدىق رەجىمىن، جۇرگىزۋشىلەردى، اۆتوكولىك توقتايتىن جولاقتى، سونداي- اق اۆتوبۋس جولاقتارىن قيىپ ءوتۋ جاعدايلارىن تاسپاعا باسادى. بۇدان بولەك، قوقىستاردى، تەمەكى تۇقىلىن تاستاعانداردى جانە تاعى دا باسقا زاڭبۇزۋشىلىقتاردى ەلەكتروندىق كوز تىركەپ وتىر.
«وسى قۇرىلعىلاردىڭ مۇمكىندىگىمەن قالا ىشىندە جۇرگەن اۆتوكولىكتەردىڭ 99 پايىزى بويىنشا اقپارات الۋ جوسپاردا بار»، - دەيدى ماماندار.
بەينەكامەرالار تولىقتاي ىسكە قوسىلعان ۋاقىتتا ەرەجە بۇزعان جۇرگىزۋشىلەرگە ايىپپۇل پوشتا ارقىلى جىبەرىلەدى نەمەسە Egov پورتالىنداعى جەكە كابينەتىنە حابارلاندىرۋ كەلەدى.
بۇدان بۇرىن حابارلانعانداي، استانا تۇرعىندارى قالا كوشەلەرىندەگى كامەرالار تۇسىرگەن ۆيدەوماتەريالداردى الا الادى.