كوكپاردان الەم چەمپيوناتىنىڭ فينالىندا قازاقستان مەن قىرعىزستان قۇرامالارى كەزدەسەتىن بولدى
كورىكتى ويىننىڭ بۇگىنگى جارىسىندا ناعىز تارتىستى دودا تاجىكستان - موڭعوليا اراسىندا ءوتتى.
كورشىلەس ەلدەردىڭ كوكپارشىلارى ايىرماسى ءبىر عانا سالىممەن ويىندى اياقتادى. ەسەپ 9:9 بولىپ تۇرعانىمەن، تاجىكتەردىڭ سوڭعى مينۋتتارداعى سالىمى موڭعول ويىنشىلارىن قاپى قالدىردى.
ەسەپ 10-9 - تاجىكتەردىڭ قورجىنىندا. وزبەكستان قۇراماسى ءوز كەزەگىندە تۇركيا كوكپارشىلارىن 14-3 ەسەبىمەن ويساراتا ۇتتى. 20 مينۋتتىق العاشقى كەزەڭدە-اق كىمنىڭ مىقتى ەكەنى بەلگىلى بولىپ قالعان. ەسەپ ايىرماسىن تۇرىك كوكپارشىلارى 3 قانا سالىممەن قىسقارتسا دا، تولىق ويىن وزبەك كوكپارشىلارىنىڭ باسىمدىعىمەن ءوتتى.
كوكپار چەمپيوناتىنا تۇڭعىش رەت قاتىسىپ وتىرعان ا ق ش- تىڭ كوۆبويلارى وسى جولى قىرعىزدارعا قارسىلاسىپ باقتى.
ءتىپتى قارسىلاستاردىڭ شەڭبەرىنە 5 سالىم دا سالىپ جىبەرگەن. الايدا ات ۇستىندەگى اساۋ ونەرگە ەجەلدەن ساقا قىرعىزدار 5 سالىمعا قارسى 11 سالىم سالىپ، ايقىن جەڭىسكە جەتتى.
سونىمەن بىرگە، ق ح ر قۇراماسى اۋعانستاندى 4:2 ەسەبىمەن ۇتسا، كوكپارعا كەلمەگەن ازەربايجان رەسەيدەن تەحنيكالىق جەڭىلىسكە ۇشىرادى. ال كوكپاردىڭ بۇل جولعى سايىس كۇنىندە قازاقستان ءبىرىنشى كۇنىنەن باستاعان مىقتىلىعىنان تايعان جوق. ۆەنگريا كوكپارشىلارىن 12-3 ەسەبىمەن تىزە بۇكتىردى.
ەسكە سالا كەتسەك، 20- تامىزدا استاناداعى «قازانات» اتشابارىندا كوكپاردان تۇڭعىش الەم چەمپيوناتى باستالعان بولاتىن.
جالپى جۇلدە 18 ميلليون تەڭگە. 27- تامىزدا ساعات 16:00 ءۇشىنشى ورىن ءۇشىن كەزدەسۋ وتەدى. اقتىق كەزدەسۋ ءدال سول كۇنى 17.00 ۋاقىتىندا باستالادى.
ءۇشىنشى ورىن ءۇشىن قىتاي مەن تاجىكستان تالاسسا، اقتىق سايىستا قازاقستان كوكپارشىلارى قىرعىزدارمەن كەزدەسەدى.