تۇلەپ ۇشقان قۇستىڭ تۇراقتاعان جەرىنە بەيىمدەلۋى ءۇشىن بىرنەشە كەڭەسىمىزگە قۇلاق ءتۇرىپ كورىڭىز.
ءبىرىنشى. تۇرعان ورنىڭىزدى باعدارلاي بىلمەي - ەش جەرگە بارا المايسىز. قالامەن تانىسىڭىز. قالانى جاياۋ ارالاۋعا كۇز ايلارى تاپتىرماس مەزگىل، بۇل كەزدە اۋا رايى ايتارلىقتاي تاماشا بولىپ تۇرادى. جانىڭىزدا سەرىگىڭىز بولسا، ءتىپتى جاقسى. جاياۋ ءجۇرۋ ارقىلى قالانىڭ بەيتانىس جەرلەرىن ەسىڭىزدە جاقسى ساقتايسىز، قاجەت دەگەنىڭىزدى جازىپ الساڭىز دا ارتىق ەتپەيدى. اداسىپ قالۋدان قورىقپاڭىز. قالادا بىرنەشە جىل تۇرعان ادامداردىڭ ءوزى قالا ءىشىن تولىقتاي جاتقا بىلمەيدى. تەك كەشكى مەزگىلگە قالىپ قويماساڭىز بولدى، اداسىپ قالساڭىز تۇرعان ورنىڭىزدان تۇرعىلىقتى مەكەنجايىڭىزعا دەيىن تاكسي ۇستايسىز. وعان مۇمكىندىك بولماسا، اۆتوبۋسقا وتىراسىز، سىزگە قالاي بارۋدى اۆتوبۋس شوپىرىنىڭ ءوزى ايتىپ جىبەرەدى.
سمارتفونىڭىزعا 2Gis باعدارلاماسىن جۇكتەپ الساڭىز الماتى، استانا، قاراعاندى قالالارىندا دىتتەگەن جەرىڭىزگە ءدوپ باسىپ بارا الاسىز. قاي جەرگە، قانداي ترانسپورتپەن، قانشا ۋاقىتتا، قانداي قاشىقتىق ءجۇرىپ باراتىنىڭىزعا دەيىن سوندا كورسەتىلگەن.
ەكىنشى. ويعا العان ءىسىڭىزدى ۇمىتىپ قالماۋ ءۇشىن بارلىعىن قويىن داپتەرگە جازىڭىز. وعان «قاعاز شىعارامىن» ، «بىرەۋگە قوڭىراۋ شالامىن» دەگەننەن باستاپ «بولاشاقتا وسىنداي كافە اشۋ كەرەك» ، «بالاما ولاي بولماۋىن ۇيرەتەمىن» دەگەنگە دەيىن ءبارى- ءبارىن جازىپ قويىڭىز. ساباق كەستەسى مەن اۋديتوريا ءنومىرىن سۇراپ كۇن سايىن توپتاستارىڭىزدى مەزى ەتكەنشە، ول دا وزىڭىزدە جازۋلى بولسىن.
ءۇشىنشى. توپتاستارىڭىزدىڭ بارلىعىمەن تانىسىپ، ءنومىر الماسىڭىز. «سەن تيمەسەڭ، مەن تيمە» دەپ جۇرە بەرسەڭىز، وقشاۋلانىپ، قالادان بەزىنە بەرەسىز. سونىمەن بىرگە جاقىن تانىستار قاتارىنا جوعارى كۋرس ستۋدەنتتەرىن دە قوسىڭىز. «اعا- اپا» دەپ سىيلاپ تۇرساڭىز، ولار سىزدەن كومەگى مەن كەڭەسىن ايامايدى.
ءتورتىنشى. جاتاقحاناعا ورنالاسقان بولساڭىز بارلىعىمەن تەز ارادا جاقىن قارىم- قاتىناس ورناتىڭىز. اسىرەسە، كورشىڭىزبەن تاتۋ بولىڭىز. قانداي جاعداي بولماسىن دۇرىس تۇسىنۋگە تىرىسىڭىز، قانداي بولسا دا سول اداممەن ءبىر جىل بويى ءبىر بولمەدە تۇرۋعا تۋرا كەلەدى. جاتاقحانانىڭ باسقا تۇرعىندارىمەن دە تىعىز قارىم- قاتىناستا بولىڭىز. ۋاقىت وتە كەلە ارالاساتىن ادامدار سۇرىپتالادى، كىمنىڭ كىم ەكەنىن تانىپ، ومىردەن ساباق الاسىز.
بەسىنشى. ساباق ءبىرىنشى ورىندا، دەگەنمەن ءوز مۇمكىندىگىىڭىزدى كورسەتۋدى دە ۇمىتپاڭىز. ستۋدەنتتەر كەڭەسى، ستۋدەنتتەر ءماسليحاتى دەگەن سەكىلدى ۇيىمدارعا كىرىپ، بەلسەندىلىك تانىتىڭىز. دەكاناتقا بارىپ قانداي قوعامدىق پايدالى ىسپەن اينالىسۋعا بولاتىنىن سۇراساڭىز، ول جەردەگىلەر سىزگە قۋانا- قۋانا جاۋاپ بەرەتىن بولادى. جاتاقحانادان ورىن الۋ قيىن بولسا، ءبىرىنشى كۋرستا بەلسەندى بولعان ستۋدەنت ءۇشىن بۇل تۇك تە ماسەلە ەمەس. ەشكىمگە زيان كەلتىرمەي، ءاردايىم ادامدارعا جىلى شىراي تانىتىڭىز. ەشتەڭەنى جۇرەككە جاقىن الماي، قيىندىققا كۇلىپ قاراساڭىز، ماسەلە ءوزى- اق كۇڭىرەنىپ كەتىپ قالادى.
Massaget.kz