جاس جىگىت ەۋروپادا كەز كەلگەن ادام تەگىن ءبىلىم الا الادى دەگەن پىكىردە. بۇل تۋرالى NUR. KZ پورتالى حابارلايدى.
جاس جىگىتتىڭ ايتۋىنشا، ول گەرمانياعا بىرنەشە سەبەپپەن كوشىپ كەتىپتى. ول استانادا نەمىس مەكتەبىن بىتىرگەن. ال «سپورتتىق مەديتسينا» ماماندىعىن ءوزى كەزىندە «استانا» فۋتبولشىسى بولعاندىقتان تاڭداپتى.
«بىرىنشىدەن مەن ەلدىڭ ءتىلىن مەڭگەرىپ العانمىن. ەكىنشىدەن، گەرمانيادا ۋنيۆەرسيتەتتەر عاسىرلار بويى قالىپتاسقاندىقتان، وندا ءبىلىم بەرۋ دەڭگەيى الدەقايدا جوعارى. ۇشىنشىدەن، مۇندا بارىنە ءبىلىم الۋ تەگىن. تەك سەمەسترىنە 100-300 ەۋرو تولەيسىڭ. ال ءبىزدىڭ ەلدە تەك جولى بولىپ، گرانتقا تۇسكەندەر عانا تەگىن ءبىلىم الادى»، - دەپ اعىنان جارىلدى جانىبەك.
«ءبىزدىڭ بالالار شەتەلدىك ديپلوم الدەقايدا قۇندى بولعاندىقتان، شەتەل اسىپ جاتىر. ونىڭ ۇستىنە ەۋروپانىڭ كوپتەگەن ەلدەرىندە وقۋ تەگىن ءارى قولجەتىمدى. سەمەسترگە تولەم ءارى كەتكەندە 300 دوللار. بەلدى ەۋروپالىق ديپلوم الۋ ءۇشىن بۇل سونداي ۇلكەن قاراجات ەمەس. ونىڭ ۇستىنە شەتەلدە وقىپ، الەم ارالاۋعا مۇمكىندىك تۋادى. مەن اتا-اناما وسىنداي مۇمكىندىكتى بەرگەندەرى ءۇشىن العىس بىلدىرەمىن»، - دەيدى جىگىت.
جانىبەك شەتەلگە وقۋعا ءتۇسۋ وڭاي ەمەستىگىن جاسىرمايدى. اتتەستاتتاعى باعاڭنان باستاپ، وقۋ ورنىنا جولداعان حاتىڭا دەيىن ءبارى ەسەپكە الىنادى.
ستۋدەنتتىك ۆيزانى الۋ دا وڭاي شارۋا ەمەس.
«سەن گەرمانيادا 8 مىڭ ەۋروعا شوت اشقانىڭدى دالەلدەۋىڭ كەرەك. بۇل شەتەلدە وقۋدى قالتاڭ كوتەرەتىنىن جانە وندا جۇمىس ىستەۋ ءۇشىن ەمەس، ءبىلىم الۋ ءۇشىن باراتىنىڭدى راستاۋ ءۇشىن قاجەت شارا. بۇل ارينە قوماقتى قاراجات. الايدا ونى ەشقايدا جۇمساماۋعا بولادى. بۇل تەك سەن گەرمانيادا وقىس جاعدايعا تاپ بولساڭ، ءوز قاراجاتىڭمەن جاعدايدى شەشە الۋىڭ ءۇشىن جاسالعان ساقتاندىرۋ.
ونىڭ ۇستىنە شامامەن وقۋدىڭ ەكىنشى جىلىنان باستاپ جالاقىسى جوعارى جۇمىسقا تۇرىپ، وقۋ مەن جۇمىستى قاتار الىپ جۇرۋىڭە بولادى. گەرمانيادا 12-13-سىنىپقا دەيىن مەكتەپتە وقيتىنىن ەسكەرسەك، قازاقستاننان كەلگەن ستۋدەنتتەر ءوز ەلىندە ءبىر جىل قانداي دا ءبىر وقۋ ورنىندا ءبىلىم الۋى ءتيىس، نە بولماسا شتۋديەنكوللەگ دەپ اتالاتىن ءبىر جىلدىق وقۋدى ءبىتىرۋى ءتيىس»، - دەپ ءتۇسىندىردى جانىبەك.
ستۋدەنت گەرمانيادا ادامدار سەنىڭ كيىمىڭە ءمان بەرمەيتىنىن، ىشكى جان-دۇنيەڭدى ءبىرىنشى كەزەككە قويىپ، باعا بەرەتىنىن ايتتى.
«ەگەر سەن كوشەگە ءۇي كيىمىمەن شىعىپ كەتسەڭ، ادامدار ساعان تەسىلە قاراپ جاتپايدى. ولارعا سەنىڭ ءوزىڭدى ۇستاۋ ادەبىڭ، قالاي سويلەيتىنىڭ مەن ارەكەتىڭنىڭ دۇرىستىعى ماڭىزدىراق. ال قازاقستاندا قانداي كولىگىڭ بارى، قانداي برەندتەگى كيىم كيەتىنىڭ ادامداردىڭ ساعان دەگەن قارىم-قاتىناسىن وزگەرتىپ سالا بەرەدى»، - دەيدى جانىبەك.
جاس جىگىت گەرمانيادا قازاقستان تۋرالى كوبى جاقسى بىلەتىنىن العا تارتتى.
«گەرمانيادا مەنى جيى قىتايلىق دەپ قالادى. بۇل مەنى ازداپ كۇيىندىرىپ جىبەرەدى. ءتىپتى قىتايلىقتاردىڭ ءوزى كەلىپ ماعان قىتايشا سويلەي باستايدى. الايدا مەن قازاق ەكەنىمدى ايتسام، كوبى ەلىمىز تۋرالى جاقسى بىلەتىن بولىپ شىعادى. اسىرەسە الماتى جانە استانانى جاقسى تانيدى»، - دەپ جالعاستىردى جانىبەك.
شەتەلدە ءبىلىم مەن تاجىريبە جيناقتاپ جۇرگەن جانىبەك بولاشاقتا قازاقستانعا ورالىپ، بىلىكتى مامان اتانباق.
جانىبەك قازاقستاندا فۋتبولعا تىيىم سالۋ كەرەك دەگەن ۇسىنىس تۋرالى ەستىگەنىن جانە وعان قارسى ەكەنىن جەتكىزدى.
«مەنىڭشە، قازاقستانداعى فۋتبولدى قىرۋار اقشا جانە جەمقورلىقپەن ءجيى بايلانىستىراتىندىقتان، وسىنداي ۇسىنىس جاسالىپ وتىر. بۇل ەشكىمگە قۇپيا ەمەس. ءبىز، قازاقستاندىقتار اقشا تۋرالى تىم كوپ ويلايمىز. وزگەنىڭ قالتاسىن ساناعاندى جاقسى كورەمىز. مەن شىنىمدى ايتسام، ءبىزدىڭ فۋتبولشىلار قانشا الاتىنىنا ەشقاشان قىزىققان ەمەسپىن. مەن ءۇشىن ويىننىڭ ءوزى قىزىق. كوپتەگەن ادامدار ءۇشىن فۋتبول - ءومىردىڭ ءمانى، سۇيىكتى حوببي. بۇل الەمدەگى ەڭ تانىمال ويىن. فۋتبولدىڭ دامۋى ەلدىڭ دامۋىمەن تىعىز بايلانىستى. سول سەبەپتى ونى جويۋعا بولمايدى»، - دەيدى جىگىت.
جۋرناليست التىن نىعمانوۆانىڭ ماتەريالىنان اۋدارىلدى