تۋرەتسكي حورى ەلباسىنىڭ استانا تۋرالى ءانىن شىرقادى - كەسكىن

استانا. قازاقپارات - «قازاقستان» ورتالىق كونسەرت زالىندا استاناداعى ماسكەۋ كۇندەرىنىڭ سالتاناتتى اشىلۋى ءوتىپ، ساحنادا تۋرەتسكي حورى ونەر كورسەتتى، دەپ حابارلايدى قازاقپارات.

تۋرەتسكي حورىنىڭ سوليستەرى ءسوزىنىڭ اۆتورى ق ر پرەزيدەنتى نۇرسۇلتان نازاربايەۆ بولىپ تابىلاتىن استانا تۋرالى «گورود موي» ءانىن (مۋزىكاسىن تولەگەن مۇحامەدجانوۆ جازعان)، سونداي-اق قازاق تىلىندە "اۋىلىم" كومپوزيتسياسىن شىرقادى.

ماسكەۋ كۇندەرىنىڭ اياسىندا ەلوردادا ءتۇرلى مادەني- بۇقارالىق، ىسكەرلىك جانە سپورتتىق، ويىن- ساۋىق شارالار وتەتىن بولادى. ماسكەۋ مەن استانانىڭ بوكستان جاسوسپىرىمدەر قۇراما كوماندالارىنىڭ بىرلەسكەن جاتتىعۋى ءوتىپ ۇلگەردى.

ءىس- شارالار باعدارلاماسىندا سونداي- اق ماسكەۋ مەن استانا ىنتىماقتاستىعىنىڭ ىسكەرلىك فورۋمى، «ماسكەۋ جانە قازاقستان. 20-عاسىردىڭ سۋرەتتەر جىلناماسى» اتتى فوتوكورمە بار.

24 -تامىز كۇنى ماسكەۋدىڭ ەكسپو-2017 كورمەسىندەگى ىسكەرلىك سەسسياسى وتەدى. ال كەشكە «استانا» كونتسەرتتىك زالىندا «گجەل» ماسكەۋ مەملەكەتتىك اكادەميالىق ءبي تەاترىنىڭ گالا- كونسەرتى جوسپارلانعان.

25 -تامىزدا ءبىرقاتار شارا وتەدى: كافەدرالدى سوبورىندا ۋسپەنيا اسا قاسيەتتى قۇداي انانىڭ قۇرمەتىنە قۇلشىلىق ەتۋ، «ماسكەۋ- استانا» حالىقارالىق مادەني- گۋمانيتارلىق فورۋم، كىتاپتار كورمەسى، تەاتر جانە كينو اكتەرى، رەسەيدىڭ حالىق ءارتىسى دميتريي حاراتياننىڭ شىعارماشىلىق كەشى.

26 -تامىز كۇنى «ماسكەۋ» جۋرنالىنىڭ باس رەداكتورى ۆلاديسلاۆ ارتەموۆتىڭ شىعارماشىلىق كەشى وتەدى.