ءۇندىستان سوتى ايەلدى تالاق ەتۋگە تىيىم سالدى
ايەل قۇقىعىن قورعاۋشىلار قاتىسقان قوزعالىس ناتيجەسىندە بۇل تاجىريبە يسلامعا قايشى دەپ تانىلدى. بۇل تۋرالى BBC جازادى.
ءۇندىستان - ەرى ايەلىنە «تالاق» (ارابشا «اجىراسۋ» ) دەگەن ءسوزدى 3 رەت ايتۋ ارقىلى عانا بىرنەشە سەكۋندتىڭ ىشىندە اجىراسىپ كەتۋگە بولاتىن الەمدەگى مۇسىلمان مەملەكەتتەرىنىڭ ءبىرى. كوپ مۇسىلمان مەملەكەتتەرىندە بۇعان تىيىم سالىنعان.
سوتتىڭ شەشىمى بۇل داستۇرگە قارسى ارىز جازىلعاننان كەيىن شىقتى. «تالاق» ارقىلى اجىراسقان بەس مۇسىلمان ايەل سوتقا شاعىمدانعان. ولاردىڭ ەكەۋى قۇقىق قورعاۋ توبىنىڭ وكىلدەرى.
« ءۇندىستاندا سوڭعى 70 -جىل بويى مۇسىلمان ايەلدەرى زارداپ شەگىپ كەلەدى. بۇل ءبىز ءۇشىن تاريحي كۇن، ءبىراق تاريحىمىزدىڭ سوڭى ەمەس. ءبىزدى قانشا ءۇندىستاندىق ايەل قولداعانىن ءتىپتى جەتكىزە المايمىن، - دەيدى بەلسەندىلەردىڭ ءبىرى زاكيا سومان جۋرناليستەرگە بەرگەن سۇحباتىندا.
سوڭعى جىلدارى ءۇندىستاندا ءوز ايەلدەرىنە «تالاق» ءسوزىن ءۇش رەت ايتىپ، اجىراسۋ وقيعاسى جيىلەگەن. ولار بۇل ءسوزدى ايەلىنىڭ الدىنا بارماي- اق، حات، سمس- جولداما نە تەلەفون قوڭىراۋى ارقىلى دا ايتىپ اجىراسا بەرگەن.
تالاق دەگەنىمىز نە؟
قۇران مەن مۇحاممەد پايعامباردىڭ سۇننەتىندە ءۇش رەت تالاق ايتۋ ەسكەرىلمەگەنىنە قاراماستان، بۇل تاجىريبە بۇرىننان بار.
زەرتتەۋشىلەردىڭ ايتۋىنشا، قۇراندا اجىراسۋدىڭ ناقتى تارتىپتەرىنە تۇسىنىكتەمە بەرىلگەن. وندا «ەگەر ايەلدەرىڭىزگە اجىراسۋعا رۇقسات بەرسەڭىزدەر، وندا بەلگىلەنگەن ۋاقىت ىشىندە اجىراسىپ، سول مەرزىمگە دەيىن ەسەپتەسۋ كەرەك جانە اللادان، ءوزىڭىزدىڭ جاراتۋشىڭىزدان قورقىڭىز!» دەلىنگەن.
قۇقىق قورعاۋشىلاردىڭ مالىمەتى بويىنشا، پاكىستان، بانگلادەش سياقتى مەملەكەتتەردە ءۇش رەت تالاق ايتىپ اجىراسۋعا تىيىم سالىنعان. ءبىراق ءۇندىستاندا بۇل تاجىريبە وتباسى مەن نەكە تۋرالى زاڭنىڭ جوقتىعىنان ءالى قولدانىلادى.
ەندى سوت «يسلامنىڭ نەگىزگى پرينتسيپتەرىنە جانە ەل كونستيتۋتسياسىنىڭ 14 بابىنداعى ازاماتتاردىڭ تەڭ قۇقىعىنا قايشى» دەپ تانىپ وتىر.
Baq.kz