كوكپاردىڭ العاشقى كۇنىندە قازاقستان قۇراماسى جەڭىسكە جەتتى
تاڭەرتەڭنەن بەرى بىرنەشە جۇپ كوكپاردان ويىن وتكىزىپ، ءوزارا باق سىناسىپ قويعان. اتاپ ايتقاندا، قازاقستان 9:2 ەسەبىمەن اۋعانستان كوكپارشىلارىنان باسىم تۇسسە، تۇركيا كوكپاردى تۇڭعىش ويناۋعا كەلگەن ا ق ش قۇراماسىنان 7:1 ەسەبىمەن باسىم تۇسكەن.
ءوز كەزەگىندە تاجىكستان قۇراماسى وزبەكستاندى 3:0 ناتيجەسىمەن جەڭسە، رەسەيلىك كوماندا ۆەنگريا قۇراماسىن 7:1 ەسەبىمەن ۇتتى.
قىتاي مەن ازەربايجان قۇرامالارىنىڭ كەزدەسۋى جوسپارلانعانىمەن، ازەربايجاندىق كوكپارشىلاردىڭ كەلمەۋى سەبەبى جەڭىس اۆتوماتتى تۇردە قىتاي كوكپارشىلارىنا بەرىلدى.
كوكپاردان الەم چەمپيوناتىنىڭ اشىلۋ سالتاناتىندا ەسترادا جۇلدىزدارى دوسىمجان تاڭاتاروۆ، يبراگيم ەسكەندىر سىندى تانىمال انشىلەر اننەن شاشۋ شاشتى. سونداي-اق، جينالعان كورەرمەندەرگە تازىلاردىڭ جارىسى كورسەتىلدى.
«ۇلتتىق سپورتتىڭ بىرنەشە تۇرىنەن حالىقارالىق دەڭگەيدە جارىس وتكىزدىك. ەندىگى كەزەكتە، كوكپاردان الەم چەمپيوناتىن ۇيىمداستىرىپ وتىرمىز. 11 ەلدىڭ كوكپارشىلارى كورەرمەندەر ءۇشىن ۇلتتىق ونەرىمىزدىڭ كوركىن قىزدىرىپ جاتىر.
«ەكسپو-2017» كورمەسىنە وراي استانامىزعا كەلگەن شەتەلدىك مەيماندار قازاقتىڭ ۇلتتىق سپورتىن تاماشالاعىسى كەلەدى. وسى ورايدا، كوكپاردان ءوتىپ جاتقان چەمپيونات ۇلتتىق قۇندىلىقتارىمىزدى الەمگە پاش ەتۋگە مۇمكىندىك بەرەدى»، - دەدى ق ر مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ ءتوراعاسى ەلسيار قاناعاتوۆ.
اشىلۋ سالتاناتىنان كەيىن موڭعوليا مەن قىرعىزستان قۇرامالارى ءوزارا باق سىناسپاق.
اۆتور: ايان بەكەن ۇلى